सरसफाईसम्बन्धी प्रदेश स्तरीय छलफल

पहुरा समाचादाता
धनगढी, ११ पुस । गैरसरकारी संस्था महासंघ (गैसस) नेपाल सुदूरपश्चिमके आयोजनामे शुकके रोज धनगढीमे सरसफाई, दिगो विकास लक्ष्य ६.२ ओ मानवअधिकारसम्बन्धी प्रदेशस्तरीय छलफल कार्यक्रम हुइल बा ।

कार्यक्रममे दिगो विकास लक्ष्मके सफा पानी तथा सरसफाइ विषयमे छलफल हुइल रहे । उ लक्ष्यअन्सार सबके लाग सफा पानी तथा सरसफाइमे पहँुच सुनिश्चित करना, सुरक्षित ओ खर्च धाने सेक्ना मूल्यमे पिना पानीमे सर्वसुलभ तथा समतामूलक पहुँच हासिल करना, सबके लाग पर्याप्त तथा समतामूलक सरसफाइ ओ स्वच्छतामे पहुँच हासिल करना ओ खुला ठाउँमे दिसा करना चलनके अन्त्य करना बा । अस्टेक उ लक्ष्यअन्सार पानी तथा सरसफाइ व्यवस्थापनके सुधारके लाग स्थानीय समुदायके सहभागिताहे साथ डेके उहिनहे और सबल बनैना रहल बा ।

कार्यक्रममे राष्ट्रिय मानव अधिकार आयोगके सुदूरपश्चिम प्रमुख मोहनराज जोशी सरसफाइ प्रभावकारी हुइक लाग सरकारके दायित्वके सँगसँगे नागरिक फेन कर्तव्य पालन गरेपरनामे जोर डेलैं । उहाँ कहलैं, ‘नेपालके संविधानमे प्रत्येक नागरिकहे स्वच्छ ओ स्वच्छ वातावरणमे बचेपैना हक डेले बा, मने नागरिक फेन सचेत हुके आपन फोहर अप्नही व्यवस्थापन करेपरल ।’

अस्टेक कार्यक्रममे धनगढी उपमहानगरपालिकाके सामाजिक विकास शाखाके अधिकृत टंक विष्ट फोहर व्यवस्थापनके लाग घरेलुस्तरसे फोहर कम होए कहिके रणनीति बनाइक परना आवश्यक रहल बटैलैं । ‘धनगढी उपमहानगरपालिकामे फोहर प्रसोधन केन्द्र बन्ना क्रममे बा, मने बनल नाइहो,’ उहाँ कहलैं, ‘होटल, रेष्टुरेन्ट, पसल, व्यवसाय, विद्यालयलगायतसे निकरना फोहरहे व्यवस्थापनके लाग नगरपालिका लागल बा ।’

अस्टेक, फोहर व्यवस्थापनके लाग सेकटसम फोहर नैकरना या टे फोहर घटाइक लाग फोहरसे इन्धन उत्पादन करेपरना सामाजिक विकास शाखाके अधिकृत विष्ट बटैलैं । उहाँ कहलैं जे फोहर उत्पादन करी ओहे ओकर व्यवस्थापन करना रणनीतिसे काम करेपरल । यकर लाग सरोकारवाला निकाससंग समन्वय करके सचेत हुइपरना बा । फोहरसे हुइना नकारात्मक असरक कम करेक लाग फोहरके उचित संकलन, प्रसोधन करना ओ सुरक्षित निस्काशन करेपरना आवश्यक परना उहाँ बटैलैं ।

कार्यक्रममे गैससके हुम भण्डारी दिगो विकासके लाग मानव अधिकार ओ सरसफाईमे फेन ध्यान डेहेपरना बटैलैं । उहाँ सरसफाई ओ स्वच्छ वातावरणमे सरकारके पनि जिम्मेवारी रहना बटैलैं । ‘महार गन्तव्य स्वच्छ सुन्दर स्वास्थ्य रहेक परठ,’ उहाँ कहलैं, ‘यकर लाग सब जे सचेत ओ सुरक्षित हुइ परठ ।’

गैसस सुदूरपश्चिम इञ्चार्ज तथा केन्द्रीय सदस्य भवराज रेग्मीके अध्यक्षतामे हुइल कार्यक्रममे फेडवासनके गंगा दुलाल लगायत मन्तव्य व्यक्त करले रहिट । कार्यक्रममे सुदूरपश्चिमके टमान जिल्लाके प्रतिनिधि सहभागी हुइल रहिट ।