श्रममन्त्री चौधरीहे कैलारी गापा अध्यक्षके चुनौती
पहुरा समाचारदाता
धनगढी, ११ पुस । प्रधानमन्त्री केपी शर्मा ओली नेतृत्वके मन्त्रीमण्डलमे नवनियुक्त श्रम, रोजगार तथा सामाजिक सुरक्षा मन्त्री गौरीशंकर चौधरीहे कैलालीके कैलारी गाउँपालिका अध्यक्ष लाजुराम चौधरी ‘अंकित’ खुला चुनौती डेले बाटै ।
पूर्व कृषि मन्त्री समेत रहल चौधरी कैलालीके निर्वाचन क्षेत्र नम्बर ३ से निर्वाचित सांसद हुइट । माओवादी आन्दोलनसे राजनीतिमे आइल उहाँ कैलारी गाउँपालिकाके स्थानीय हुइट । ओहकान पार्टी सहकर्मी तथा उहे गाउँपालिका अध्यक्ष लाजुराम चौधरी आपन फेसबुकमे लेख्टी कडा चुनौती डेहल हुइट ।
गौरीशंकर चौधरी मन्त्रीमे सपथ लेहलपाछे गाउँपालिका अध्यक्ष लाजुराम प्रतिक्रिया जनैटी लिख्ले बाटै, ‘कमरेडहुक्रे कौनो संकोच नाइ मन्बी मिति २०७७ पुस ५ गते पार्टी अलग हुइल बेला गौरीशंकरहे दलाल ओ चातुकार कहले रहुँ । अपनेक दश करोड ऋण बा ।
अपने ऋण तिरक लाग ओलीके चातुकार बन्बी । उहाँ उहे दिन ओलीके गाली ओ बेइज्जत करलै । बडो हसिलो ओ मुस्कान अनि क्रान्तिके बात करलै, अचम्म अनि मै का सोचल हुइबुँ चिन्ता अनि भोकाइल अनुहारहे के खवाइना ? ‘रातके नाइ खैनु सकारे नाइ खैनु,’ गौरीजी कहलपाछे खाना खवाइनु । हासी माजाक उहे हुइल, ‘दलाल ओ चातुकार न बन्बी’ काठमाडौं पठैली । टिकटके बात न करी न उहे दिन के ‘पेट्रोल’ के आज उहे हुइल… आब आइजाइ तोर भाषण ओ मोर भाषण ? दलाल हम्रे कैलारीके कमरेड एक बाटी ।’
अध्यक्ष चौधरी मन्त्री चौधरीहे अइना चुनावमे कडा टक्कर डेना चुनौती डेहल हुइट । उहाँ मन्त्री हुइलपाछे ओहकान निर्वाचन क्षेत्रके पार्टी कार्यकर्ता सामाजिक सञ्जालमे आक्रोश पोख्ले बाटै ।
