मन्त्री चौधरीके पुतला दहन
पहुरा समाचारदाता
धनगढी, ११ पुस । श्रम, रोजगार तथा सामाजिक सुरक्षा मन्त्री गौरीशंकर चौधरी सपथ ग्रहण करल २४ घण्टा बिते नाइ पैटी ओहकान निर्वाचन क्षेत्रमे पुतला दहन हुइल बा । कैलाली निर्वाचन क्षेत्र नम्बर ३ स्थित ओहकान घर रहल कैलारी गाउँपालिकाके हसुलियामे ओहकाने समर्थकहुक्रे शनिच्चर दिनके पुतला दहन करल हुइट ।
‘संसद विघटन करे नाइ मिली,’ ‘गौरीशंकर मुर्दावाद’लगायत नाराबाजी करटी पुतला दहन करल रहिट । कुछ दिन आघेसम मन्त्री चौधरी पार्टी कार्यकर्ताहे सम्बोधन करटी अपने प्रतिनिधि सभा विघटनके विरोधमे रहल ओ प्रचण्ड–नेपाल समूहमे रहल कहटी प्रधानमन्त्री केपी शर्मा ओलीके कडा आलोचनामे उत्रल रहिट ।
मने काठमाडौं जैटी किल मन्त्रीके सपथ लेहलपाछे ओहकान नैतिक ओ चरित्रउपर कडा आलोचनामे उटरके कार्यकर्ता पुतला दहन करल हुइट । मन्त्री चौधरीके नेकपा ओली समूहमे प्रवेशसे आक्रोशित हुइल कैलारी गाउँपालिके अध्यक्ष लाजुुराम चौधरी पदके मोहमे नेता ओ कार्यकर्ताउपर विश्वासघात करल अरोप लगैलै ।
प्रधानमन्त्री केपी शर्मा ओली शुकके मन्त्रीमण्डल विस्तार करटी चौधरीहे सपथ ग्रहण कराइल रहिट ।
सम्बन्धित समाचार
