“माओके माक्र्सवाद–लेनिनवादके विकासमे महत्वपूर्ण योगदान”
पहुरा समाचारदाता
धनगढी, ११ पुस । १२८ औं माओजयन्तीके उपलक्ष्यमे शनिच्चरके रोज धनगढीमे ‘विश्व कम्युनिष्ट आन्दोलनमे माओत्सेतुङके योगदान’ विषयक अन्तरक्रिया कार्यक्रम हुइल बा । कार्यक्रममे विश्व कम्युनिष्ट आन्दोलनमे माओके औचित्यबारे छलफल हुइल रहे ।
२२ रानीतिक दल तथा संघसंस्थाके ओयनामे हसइल कार्यक्रममे राष्ट्रिय जनमोर्चाके केन्द्रीय सदस्य मनोज भट्ट अन्तर्राष्ट्रिय कम्युनिष्ट आन्दोलनमे माओके योगदान विषयक कार्यपत्र प्रस्तुत करले रहिट ।
कार्यपत्र प्रस्तुत करटि केन्द्रीय सदस्य भट्ट रक्षात्मक अवस्थामे पुगल विश्व कम्युनिष्ट आन्दोलनहे उप्पर उठाइक लाग माओके विचार और बह्रल बटैलैं । ‘माओ चीनमे स्थापना करल जनवादी व्यवस्थाहे समाजवादमे रुपान्तरण करलैं,’ उहाँ कहलैं, ‘माओसे विकास करल विचार ओ सिद्धान्त लेनिनके युगचित्तरके विषय रहलेसे फेन विश्व कम्युनिष्ट आन्दोलनके लाग महत्वपूण बा । माओके माक्र्सवाद–लेनिनबादके गुणात्मक विकासमे महत्वपूर्ण योगदान बा ।’
‘माओके नयाँ जनवादी क्रान्तिसे दुई ठो अभिभारा पूरा करठ,’ उहाँ कहलैं, ‘साम्राज्यवादी उत्पीडनके तख्ता बिल्टैना राष्ट्रिय क्रान्ति करना ओ सामन्ती तथा जमिन्दार वर्गके उत्पीडनके तख्ता बिल्टैना जनवादी क्रान्तिके पहिल अभिभारा रहल माओ व्याख्या करले बाटैं ।’ पार्टीभित्तर ओ समाजमे डेखा परल समस्याहे समाधान करेक लाग माओ द्वन्द्वात्मक भौतिकवादी दर्शनके व्यावहारिक प्रयोगमे जोड डेहल केन्द्रीय सदस्य भट्ट बटैलैं ।
कार्यक्रममे नेकपा (प्रचण्ड–माधन नेपाल) के दिनेशचन्द सुवेदी कम्युनिष्ट आन्दोलनमे माओके महत्वपूर्ण योगदान बा कटी पार्टीमे रहल अन्तरविरोधहे सकारात्मक तरिकासे समाधान नैकरमे खेद व्यक्त करलैं ।
कार्यक्रममे माओवादी केन्द्रके ध्रुव संज्याल, राष्ट्रिय जनमोर्चाके मिलन शाही, नेकपा (माले)के परेकबहादुर रावल, नेता डम्मर विष्ट, सीता चौधरी, पत्रकार मनमोहन स्वाँर ओ वीरेन्द्र रावल प्रगतिशील लेखक संघके तिलकसिंह शर्मा, समकल्याण साहित्यक मञ्चके अध्यक्ष कल्याण ओझालगायत मन्तव्य व्यक्त करले रहिट ।
नेकपा क्रान्तिकारी माओवादीके सुदूरपश्चिम सेक्रेटरी एवं केन्द्रीय सदस्य रामबहादुर महराके अध्यक्षतामे हुइल कार्यक्रममे स्वागत राष्ट्रिय जनमोर्चाके जिल्ला सचिव जगत जोशी करले रहिट ।
