प्रचण्ड–नेपाल समूहके धनगढीमे विस्तारित बैठक
पहुरा समाचारदाता
धनगढी, १२ पुस । नेपाल कम्युनिष्ट पार्टी (नेकपा) के पुष्पकमल दाहाल ‘प्रचण्ड’ ओ माधवकुमार नेपाल पक्ष समूहके धनगढीमे विस्तारित बैठक सम्पन्न हुइल बा ।
अँट्वारके ७७ जिल्लामे हुइना कार्यकर्ता भेला अन्तर्गत धनगढीमे फेन हुइल हो । प्रतिनिधिसभा विघटनविरुद्ध संघर्षके कार्यक्रम घोषणा करल प्रचण्ड नेपाल समुह अँट्वारके देशभर अभिमूखिकरण कार्यक्रम करल हो ।
नेकपाके यी समूहसे मंगरके राजधानी लगायत जिल्लामे विरोध प्रदर्शन कैना कार्यक्रम तय करले बा कलेसे २० गतेसम नगरपालिका ओ गाउँपालिकामे पार्टीके बैठक ओ भेला कैना जनैले बा ।
ओस्टके, २५ गतेसम वडामे पार्टीके बैठक ओ भेला हुइना बा । शनिच्चरके बैठल उ पक्षके सचिवालय बैठकसे संगठन परिचालन ओ विस्तारहे तिब्रता डेना निर्णय करल रहे ।
प्रधानमन्त्री केपी शर्मा ओलीसे संसद विघटन करलसंगे नेकपा दुई समूहमे विभाजित बा । ओली समुह चुनावी रणनीतिमे लागल बा कलेसे प्रचण्ड–नेपाल समुह सडक आन्दोलनमे केन्द्रित रहल बा ।
डुनु पक्ष आपन समूहहे आधिकारीक मान्यता डेना लडाईमे केन्द्रीत बाटै । डुनु पक्ष आधिकारीकता दावी करटी निर्वाचन आयोगमे निवेदन डेसेकल बाटै ।
धनगढीमे हुइल कार्यक्रमहे सम्बोधन करुइया सक्कु जाने प्रधानपन्त्री केपीशर्मा ओलीसे असंवैधानिक रुपमे करल संसद विघटनविरुद्ध सशक्त आन्दोलन कैना चेतावनी डेहल रहिट ।
