कोरोना कहरपाछे धनगढीमे १५० व्यवसायी ठप्लै

पहुरा समाचारदाता
धनगढी, १३ पुस । धनगढी उपमहानगरपालिका वडा नम्बर १४ के तेजप्रकाश तिवारी कोरोनाके संक्रमण फैललपाछे मलेसियाके मजदुरी छोरके घर लौटलैं । महामारीके बेला पाइल दुःखसे उहाँ कबु विदेश नैजैना बनाइल । तिवारी अब्बे व्यावसायिक रुपमे छेगरीपालन करले बाटैं ।

धनगढी उपमहानगरपालिका वडा नम्बर १ शान्तिकटानके पदमबहादुर सिंहके कोरोनाके कारण भारतके चौकीदारी छुटल । डगर खर्चके जोहो करके नेपाल लौटल सिंह अब्बे मुरगीपालन करले बटै । ४० दिनमे ४५ हजार कमैना बटुइया सिंह आव कबु परदेश नैजैना बटैठैं ।

तिवारी ओ सिंह केल नाही कोरोनाके कहरके बीच धनगढी उपमहानगरपालिका वडा नम्बर १, १४ ओ १५ मे १ सय ५० जाने लौव व्यवसाय सुरु करले बाटैं । कोभिड–१९ प्रभावितके लाग सामाजिक आर्थिक रिकभरी परियोजना सुरु करके विदेशसे लौटलहुकनहे स्वरोजगार बनैना सुरु करले बा ।

विदेशसे लौटुइयाहे व्यवसायिक रुपमे छेगरीपालन, मुरगीपालन, टिनाखेती, च्याउँ खेती, बंगुरपालन ओ होटल व्यवसाय कैना ओर उत्प्रेरित करटी रहल बाटैं । व्यवसाय करेक लाग सबसे पहिले व्यक्तिहे मानसिक रुपमे तयार कैना बहुट समस्या रहठ । धनगढी उपमहानगरपालिकाके प्रमुख नृपबहादुर वड कहलै, ‘लकडाउनके समयमे विदेशसे लौटलहुकनके विवरण संकलन करके ओइनमे इच्छाशक्ति जगाइक लाग उद्यमशिलता विकास तालिम डेहे कुछ अनुदान ओ कुछ स्वयंके लगानीमे व्यवसाय सुरु करे लगागिल ।’

धनगढी उपमहानगरपालिका ओ यूएनडिपीके सहयोगमे कोभिड–१९ प्रभावितके लाग सामाजिक आर्थिक रिकभरी परियोजना सुरु करले बा । यकर स्थानीय साझेदारी लघु उद्यमी समुहसे करल नगरप्रमुख वड बटैलै ।

धनगढी उपमहानगरपालिका १४ के बिस्ना थापा विदेश कबु नैजैना मनस्थिति बनाके टिना खेती सुरु करल बटैली । गोसिया कामके लाग भारत जाइट थापा कहली, ‘अब्बे संग आर्गानिक टिना खेती करल रहल बटी ।’ भारतमे नौकरी करके कमैना पैसा गाउँमे टिना खेती करके कमाई सेक्ना सम्भावना विल्गाइल ओरसे अपने व्यावसायी रुपमे लागल उहाँ बटैली ।