उच्च अदालतके फैसला विरुद्ध थरुहट मोर्चासे संघर्षके कार्यक्रम घोषणा
धनगढी, १३ पुस । टीकापुर घटनाके बारेम उच्च अदालत दिपायलके फैसलाके विरुद्ध थरुहट थारुवान राष्ट्रिय मोर्चासे आन्दोलनके घोषणा करले बा । उच्च अदालतके फैसला नश्लके आधारमे करल आरोप लगैटी मोर्चासे तराईके जिल्लामे पुस १६ गतेसे फागुन २ गतेसम आन्दोलनके कार्यक्रम सार्वजनिक करले बा ।
‘नेपाल सरकारसँग अविलम्ब थरुहट राजबन्दीके निशर्त रिहासँगे १४ बुँदे माग मुद्धा तथा हुइल सहमित सम्झौता अक्षरशः कार्यान्वयन करैना जोडदार माग करटी थप संघर्षके कार्यक्रम घोषणा कैना बाध्य हुइल थरुहट थारुवान राष्ट्रिय मोर्चासे अँट्वार प्रकाशित करल बिज्ञप्तिमे उल्लेख बा ।
मोर्चाके कावा संयोजक श्रवण थारुसे प्रकाशित बिज्ञप्तिमे कहल बा–‘सम्मानित उच्च अदालत दिपायलसे आपन विवेक गुमैटी सरकार, पहिचना बिरोधी दल, नेताहुक्रनके प्रलोभान ओ दवावमे परके पुर्वाग्रह पुर्ण ढंगसे करल अन्याय ओ विभेदपुर्ण फैसला कैके झन द्वन्द्व चर्कैना काम करले बा ।’
घोषित संघर्षके कार्यक्रममे पुस १७ गते टीकापुर घटनाके बारेम उच्च अदालतल करल फैसलाके बिरोधमे प्रधानमन्त्रीके पुत्ला दहन कैना ओ पुस १९ गते तराईके सक्कु जिल्ला सदरमुकाममे करिया पट्टी बाँधके बिरोध प्रदर्शन कैना जनैले बा । ओस्टके पुस २० गते कन्चनपुरके महेन्द्रनगर ओ २१ गते कैलालीके धनगढी सहित तराईके सक्कु जिल्लामे माघ १७ गतेसम बिरोध सभा करजैना बिज्ञप्तिमे उल्लेख बा ।
माघ १९ गते तराईके सक्कु जिल्ला प्रशासन कार्यालयमे घेराउ प्रदर्शन ओ ज्ञापनपत्र बुझैना, माग पुरा कराइक लाग दवावके लाग सरकारके हरेक काममे असहयोग कैना, राजनैतिक दल ओ नेताहुक्रसँग लबिङ कैना, प्रधानमन्त्री ओ मन्त्रीके तराईके जिल्लामे निषेध कैना ओ करियाझण्डा प्रदर्शन कैना कार्यक्रम मोर्चासे घोषणा करले बा ।
उच्च अदालत दिपायल पुस २ गते टीकापुर घटनामे दोषी ठहर करटी संघीय साँसद रेशम चौधरीके आजीवन जेल सजाय सदर करल रहे कलेसे यिही आघे कैलाली जिल्ला अदालतसे तोकल जेल सजाय भोगसेकल लक्ष्मण चौधरीहे आजीवन कैदके सजाय सुनाइल रहे । ओस्टके राम प्रसाद चौधरीहे छ बरस कैदके सजाय उच्च अदालतसे सुनाइल रहे ।
