मुख्य योजनाकार सुक राना पक्राउ
पहुरा समाचादाता
धनगढी, १३ पुस । जुगेडा अस्थायी प्रहरी पोष्टमे कार्यरत प्रहरी सहायक निरिक्षक गोविन्द विक ओ प्रहरी जवान रामबहादुर साउँदके हत्या प्रकरणके मुख्य योजनाकार पक्राउ परल बाटै ।
जिल्ला प्रहरी कार्यालय कैलाली सोम्मारके पत्रकार सम्मेलन कैके उपमहानगरपालिका–१० के ३४ वर्षिय सुकबहादुर कहुइया अमर रानाहे सार्वजनिक करल हो । सुदूरपश्चिम प्रहरी कार्यालय ओ जिल्ला प्रहरी कार्यालयके संयुक्त टोली रानाहे अँट्वार साँझ ७ बजे धनगढी उपमहानगरपालिका वडा नं १९ फुलवारी एरियाके नेपाल भारत सीमा लग्गेसे पक्राउ करल जिल्ला प्रहरी कार्यालयके प्रमुख अनुपम समशेर जबरा जानकारी डेलै । दुई महिना पाछे पक्राउ परल रानाहे थप अनुसन्धानके लाग कैलाली अदालतमे पेश करजैना जनाइल बा ।
तस्करीके ट्रान्जिट क्षेत्र मानजैना धनगढी जुुगेडा क्षेत्रमे तस्करहुक्रनके गिरोह ओ गस्तीमे रहल प्रहरीबीच दोहोरो झडप होके घटना घटल प्रहरीके निष्कर्ष रहल बा । गिल कार्तिक १ गते नियमित गस्तीमे खटल बेला अस्थायी प्रहरी पोष्ट धनगढी जुगेडाके इन्चार्ज प्रहरी सहायक बिक ओ प्रहरी जवान साउद वेपत्ता हुइल रहिट । बिक कार्तिक २ गते नेपाल–भारत सीमाके मोहना लडियामे विभत्स हत्या करल अवस्थामा भेटल रटि । कलेसे कार्तिक ४ गते साउँद फेन उहे लडियामे हत्या करल अवस्थामे फेला परल रहिट ।
धनगढी उपमहानगरपालिका–१० स्थित मोहना लडियामे अन्दाजी ४०० मिटर उत्तरमे सीमामे अवैध समानहुकनके तस्करी करटी तस्करहुकनके समूहहे रोक्न एवं नियन्त्रणमे लेना क्रममे तस्करके समूहसे योजनावद्ध रुपमे धरियार हतियार प्रहार करके दुनु जनहनके हत्या करल प्रहरी जनैले बा ।
उहे घटनामे संलग्न ९ जनहनहे प्रहरी इहीसे आघे पक्राउ करसेकल बा । पक्राउ परुइयामे कैलाली धनगढी उपमहानगरपालिका वडा नम्बर १० बैठना वर्ष ३१ के पर्कु कना रोहित राना, वर्ष २० के राजेन्द्र राना, वर्ष ३० के चोर कना सुरेश राना, वर्ष २५ के गब्बर कना राजकुमार राना, वर्ष २२ के रामनिवास राना, वर्ष २९ के टल्लु कना दलराम राना ओ धनगढी उपमहानगरपालिका वडा नम्बर ११ बैठना वर्ष २५ के गोपाल कना रामगोपाल राना रहल बाटै ।
