काठ दाउरा विक्री वितरण खोले पर्ना माग करटी धर्ना
पहुरा समाचारदाता
धनगढी, १३ पुस । सरकारसे काठ दाउरा विक्री वितरण खोले पर्ना माग करटी वैज्ञानिक वन व्यवस्थापन सरोकारवाला सञ्जालसे सोम्मारके रोज जिल्ला प्रशासन कार्यालय धनगढीमे धर्ना डेले बाटै ।
उहाँहुक्रे पुर्वघोषित कार्यक्रम अनुसार अँट्वारके डिभिजन वन कार्यालय धनगढीमे धर्ना डेले रहिट । कलेसे सोम्मारके जिल्ला प्रशासन कार्यालय कैलालके गेट आघे धर्ना डेहल हुइट ।
सरकारसे सामुदायिक वनमे घाटगद्दीमे रहल कठ्वाके हैसियत बिग्रलेसे फेन कौनो ठोस योजना लाने नाइ सेकल कहटी उहाँहुक्रे कुछ दिनसे आन्दोलनमे उत्रल हुइट । सरकारसे २०७७ जेठ १५ गते देशभर काठदाउरा बिक्री बितरणमे रोक लगाइल रहे ।
सरकारसे कौनो योजना बिना हचुवाके भरमे काठ बिक्री बितरण रोक लगाइबर देशभरके अर्थतन्त्र धरासायी अबस्थामे पुगल अन्दोलनमे सहभागि भारताल साझेदारी वनके संयोजक यावद भण्डारी जानकारी डेलै ।
‘नेपालमे सामुदायिक वनके घाटगद्दीमे काठ कुहना अवस्थामे पुगसेक्लेसे फेन, सरकारसे उ काठ व्यवस्थापन कैना कौनो योजना नाइ नल्ले हो’ बाह्रबन साझेदारीके अध्यक्ष ठक्कर शाही कहलै–‘यी सरकारसे निर्णय नाइ सच्याइटसम हमार आन्दोलन जारी रही ।’
सरकारसे बिदेशी काठ भित्र्याइना चलखेल्लेसे फेन नेपालमे बिक्री बितरण रोक लगाइल वैज्ञानिक वन व्यवस्थापन सरोकारवाला सञ्जाल धनगढीके अध्यक्ष गणेश रावल बटैलै ।
उहाँहुक्रे आन्दोलन कार्यक्रम अन्र्तगत पुस ७ गते मुख्यमन्त्री कार्यालयमार्फत प्रधानमन्त्रीसहित टमान निकायमे ध्यानाकर्षण पत्र बुझाके सुरु करल रहिट । ओस्टके १४ गते सुदूरपश्चिम उद्योग, पर्यटन, वन तथा वातावरण मन्त्रालय ओ १५ गते मुख्यमन्त्री तथा मन्त्रीपरिषदके कार्यालयमे धर्ना डेना कार्यक्रम रहल बा ।
उ आन्दोलनसे फेन सरकार सुनुवाई नाइ करलेसे १६ गतेसे राजमार्ग अनिश्चितकालिन चक्का जाम करजैना उहाँहुक्रे बटैले बाटै ।
