महिला सुरक्षा आवासगृह हस्तान्तरण

पहुरा समाचारदाता
चौमाला, १४ पुस । कैलालीके गौरीगंगा नगरपालिकास्थित बडैपुरमे संचालन हुइल महिला सुरक्षा आवासगृह पालिकाहे हस्तान्तरण कैगिल बा ।

ओरेक नेपाल कैलाली ९ महिनासे अपनही संचालन करटी आइल महिला सुरक्षा आवासगृह मंगरके रोज गौरीगंगा नगरपालिकाहे हस्तान्तरण करल हो । सुरक्षा आवासगृहके पचास प्रतिशत पालिका ओ पचास प्रतिशत ओरेक नेपालसे हेरना करके हस्तान्तरण करल ओरेक नेपाल कैलालीके जिल्ला संयोजक विनुराना जोशी बटैली । महिला सुरक्षा आवासगृहके जिम्मा पालिका लेहलपाछे ओरेकसे गौरीगंगा नगरपालिकाहे सम्मानफे करले बा ।

कार्यक्रममे ओरेक नेपाल कैलालीके जिल्ला संयोजक विनुराना कोभिडके बेला गौरीगंगामे सबसे ढेर लैङिक हिंसा हुइल बटैली । गौरीगंगा नगरपालिकाके बडैपुर संचालन हुइल महिला सुरक्षा आवास गृहमे भजनीके २, घोडाघोडीके ६, गौरीगंगाके २१, दार्चुलाके १, जोशीपुरके १, घनगढीके १ करके ३३ जाने नौ महिनाके अवधिमे सेवा लेहल उहाँ जनैली । जेम्ने २१ ठो घरेलु हिंसा, आठ ठो बालविवाह, २ ठो बहुविवाह, २/२ ठो बलात्कारके घटना ओ बलात्कारके प्रयास रहल बा । जेम्नेसे ४ मुद्दा केल दर्ता हुइल बा । कलेसे और घटना न्यायिक समिति, प्रहरी प्रशासन मार्फत मिलापत्र हुइल संयोजक जनैली ।

उहे विच उ महिला सुरक्षा आवास गृहहे ओरेक नेपालसे टिसर्ट, प्लाजु, पेन्टी,ब्रा, छाता, मेसिन, पीपी सेट, स्याफु, सर्फ, टन्ना, डस्ना, सिरानी, ब्लाइङकेट, कम्मल, टवालिया, झुल, भन्साक सक्कु समान, प्राथमिक उपचार किट बक्स लगायत समान हस्तान्तरण करले बा । महिला सुरक्षा आवास गृहके लाग दलित महिला अधिकार मञ्च ६ महिनाके लाग काउन्सेलर ओ खाद्यन्न सहयोग करले ।

कार्यक्रम गौरीगंगा नगरपालिकाके नगर प्रमुख भीमबहादुर देउवाके अध्यक्षतामे हुइल रहे । हस्तान्तरण कार्यक्रममे गौरीगंगा नगरपालिकाके टमान वडाके अध्यक्ष, कार्यपालिका सदस्य, वडा सदस्यहुकनके सहभागिता रहे ।