न्यायलयके फैसला विरुद्ध सडकमे उत्रे परल

पहुरा समाचारदाता
धनगढी, १४ पुस । नेकपाके सुदूरपश्चिम प्रदेश सचिव नेपबहादुर थारु (सिंहराज) प्रधानमन्त्री केपी शर्मा ओली योजनाबद्ध तरिकासे राष्ट्रहे पश्चगामी ओर लैजैटी संसद विघटन करल बटैले बाटै ।

उहाँ प्रतिनिधि सभा पुनस्र्थापनाके लाग सक्कु परिवर्त चहुइयाहुक्रे एक जुट होके स्वार्थ पुरा करुइया नेता तथा नेतृत्व विरुद्ध आन्दोलनमे उत्रना जरुरी रहल बटैलै । सञ्चारकर्मीहुक्रनसंग बात बट्वाइटी उहाँ कहलै, ‘आब जनता सडकमे उत्रना जरुरी रहल बा । जनता नै सर्वप्रिय निर्णायककर्ता हुइट, आपन योगदान पश्चात प्राप्त उपलब्धीके लाग आन्दोलनके विकल्प स्वयम खोज्ना जरुरी रहल बा ।’

उहाँ संघीय लोकतन्त्रके रक्षाके लाग जनताहे सदा सहयोग कैना तयार रहल प्रतिवद्ध रहल बटैलै । प्रदेश सचिव थारु कहलै, ‘संसद विघटनके मुद्धा ओ टीकापुर घटनाबारे उच्च अदालतसे करल फैसला प्रति न्यायलयसे जनताहे अन्याय करले बा ।’

टीकापुर घटनाप्रति उच्च अदालतसे करल फैसला गलत हो, इहीहे राजनीतिक ढंगसे सुल्झाइ परल, अन्यायमे परल थारुनहे सर्वोच्चसे न्याय डेहे जोड डेलै ।