शिवरत्नपुरवासी ३ दशकसे लालपुर्जाबिहिन

• सरकारी सेवा– सुविधासे वञ्चित

पहुरा समाचारदाता
धनगढी, १६ पुस । कैलारी गाउँपालिका वडा नम्बर ३ अन्तर्गतके शिवरत्नपुरके स्थानीय तीन दशकसे लालपुर्जा बिहिन रहल बाटै ।

२०४३ सालसे उ ठाउँमे बैठल उहाँहुक्रनके आभिनसम केक्रोठन जग्गाके लालपुर्जा नाइहो । इन्डियाके दुधुवा नेशनल पार्कसे जोरल उ गाउँमे अब्बे ८५ घरधुरी सुकुम्बासी, मुक्त कमैयाके परिवार बसोबास करटी आइल बाटै । गाउँके स्थानीय कमलप्रसाद चौधरी बर्सौसे ऐलानी जग्गामे बैठ्टी आइल बटैलैं । उहाँ लालपुर्जाके बारेम आपनहे खासे जानकारी नाइ रहल बटैलै ।

उहाँ कहलै– ‘एकठो जिल्ला स्तरीय समिति बनल बा कना सुन्ले बाटुँ, मने आभिनसम गाउँक केक्रो नम्बरी जमिन नाइहो, सक्कु जाने ऐलानीमे बैठ्टी आइल बाटी ।’ चुनावके बेला लालपुर्जा डेबी कहिके नेताहुक्रे खोब भाषण छँट्लेसे फेन जितलपाछे गाउँमे एकचो फेन नाइ अइना उहाँ बटैलैं । उहाँ लालपुर्जा नाइ होके कारोबार लगायत सक्कु सेवासुविधासे वञ्चित रहल बटैलै ।

कमल जस्टे ललिता चौधरी जग्गाके लालपुर्जा नाइ होके सक्कु सेवासुविधासे वञ्चित हुइ परल बटैली ।

उहाँ कहली– ‘राज्यसे पैना सेवासुविधा लगायत कुछ काम करेबर लालपुर्जा चहना हुइल ओरसे लालपुर्जा नाइ होके ढिउर समस्या हुइना करल बा । लालपुर्जा कहिया मिलठ्, मिलट टे मजा हुइना रहे ।’

बैंकसे ऋण निकारके कुछ व्यापार व्यवसाय करु कलेसे फेन लालपुर्जा नाइहोके समस्या हुइना करल औरे स्थानीय जोखनलाल चौधरी आपन समस्या पोख्लै । ‘बिना प्रमाणके टे बैंक ऋण नाइ डेहठ, गाउँपालिकासे फेन कुछ सेवा लेहे खोज्बो कलेसे लालपुर्जा मागठ्,’ जोखन कहलै– ‘जग्गाके लालपुर्जा रहट कलेसे कौनो व्यापार व्यवसाय कैना सजिल हुइट ।’

यिहे पुस २ गते भूमि सम्बन्धी समस्या समाधान आयोग ओ कैलालीके टनाम स्थानीय तह बीच जग्गा उपलब्ध करैना समझदारी पत्रमे हस्ताक्षर हुइल बा । जग्गा उपलब्ध करैना विषयमे समझदारी हुइलपाछे भर यहाँके स्थानीय लालपुर्जा पैनामे खुशी बाटै ।

यहोर कैलारी गाउँपालिका प्रमुख प्रशासकीय अधिकृत खगेन्द्रराज जोशी कुछ दिनभित्रे कार्यालय स्थापना कैके गाउँपालिका अन्तर्गतके भूमिहीनहुक्रनके तथ्यांक संकलनके कार्य आघे बह्रैना तयारी करल बटैलै । ओकर लाग गाउँपालिकासे सर्भेक्षक, तथ्यांक संकलक, लगत प्रविष्ट ओ सामाजिक परिचालक लगायतके कर्मचारी भर्ना फेन खोलसेकल जनैले बा ।