२०९ मानव उलंघनके घटना सार्वजनिक

३० बालिका बलात्कृत, ९ बालिका उप्पर यौन दुव्र्यवहार

पहुरा समाचारदाता
धनगढी, १६ पुस । अनौपचारिक सेवा केन्द्र (इन्सेक) सुदूरपश्चिम प्रदेश कार्यालय एक बरसमे २ सय ४ घटनामे २ सय ९ जाने पीडित हुइल घटना सार्वजानिक करले बा ।

छ भारी महासन्धीमे आधारित हुके संकलन करल घटनाके तथ्यांङक विश्लेषण सहित घटना विवरण सार्वजनिक करल हो ।

नेपाल मानव अधिकार वर्ष पुस्तक २०२१ के प्रकाशन पूर्व समीक्षा कार्यक्रममे विफेक रोज एक कार्यक्रमके बीच इन्सेक प्रदेश संयोजक खडकराज जोशी सन् २०२० जनवरीसे २०२० डिसेम्बरसम कैलाली जिल्लामे २०९ जाने प्रत्यक्ष पीडित हुइल जनैलै । जेम्ने राज्य पक्षसे एक जाने महिला १४ जाने पीडित हुइल ओ गैर राज्य पक्षसे १ सय २४ जाने महिला, ३९ जाने बालिका सहित १ सय ९९ जाने पीडित हुइल इन्सेक कार्यालयमे अभिलेख हुइल उहाँ जनैलै ।

प्रतिबन्धित नेकपाके गतिविधिमे संलग्न हुइल कहटी एक महिला सहित १० जाने प्रतिबधित नेकपाके नेता तथा कार्यकताहुकनहे प्रहरी गिरफतार करल इन्सेकसे अभिलेख करले बा । गिरफतार करल मन्से पाँच जनहनहे प्रहरी फेरसे गिरफतार करल पागिल जनागिल बा । प्रहरी हिरासत, कारागारके २÷२ जानेक मृत्यू हुइल अभिलेख कैगिल बा ।

यी अवधिमे महिला ओ बालिका करके १ सय ८१ जाने पीडिट हुइल पागिल बा । घरेलु हिंसासे केल ८१ जाने महिला पीडित हुइलै कलेसे २८ जाने महिला उप्पर बलात्कार ओ १२ जाने महिला उप्पर बलात्कारके प्रयास हुइल जनागिल बा ।

बोक्सीके आरोपमे २ जाने पीडित, मानव बेचविखन तथा ओसरपसारसे ११ जाने ओ बहुविवाहसे ४ जाने पीडित हुइल पागिल बा कलेसे उ अवधिमे ३९ जाने बालिका पीडित हुइलमे ३० जाने बालिका उप्पर बलात्कार ओ नौ जाने बालिका उप्पर यौन दुव्र्यवहार हुइल घटना अभिलेख हुइल जनागिल बा । बलात्कृत मन्से पाँच जाने बालिका अपने बाबासे बलात्कृत हुइल बटै ।

जातीय विभेद घटनामे चार जाने पीडित हुइल, बनुवामे बेवरिसे अवस्थामे फेला परल वस्तु विस्फोट हुके एक जानेक ज्यान गैल, तीन पत्रकार उप्पर कुटपिट ओ दुई जाने प्रहरीके हत्या हुइल घटना समेत इन्सेकसे अभिलेख करले बा । चार जाने महिलाके परिवारसे हत्या करल इन्सेक अभिलेख करले बा ।