गरिब परिवारहे डंडुर कपरा

पहुरा समाचारदाता
बर्दिया, १६ पुस । बर्दियाके कालिका सामुदायिक पुस्तकालय ओ स्रोत केन्द्रके आयोजनामे रिड नेपालके सहयोगमे सात बरससे टरक बालबालिका ओ ६० बरससे उप्परके वृद्धहुकनहे डंडुर कपरा वितरण करगिल बा ।

ट्याग परियोजना अन्तर्गत आपतकालीन सहयोग कोषसे कोभिड–१९ के कारणसे प्रभावित विपन्न वर्गके परिवारहे डंडुर कपरा वितरण करगिल हो ।

बढैयाताल गाउँपालिका वडा नं. ७, ८ ओ ९ के ४८ जहन अति विपन्न परिवारके १० बालवालिकासहित ३८ वृद्धहुकनहे डंडुर कपरा वितरण करगिल रहे ।

कार्यक्रमके बरका पहुना बढैयाताल गाउँपालिकाके उपाध्यक्ष दिपा गौतम विपन्न परिवारहुकन जारमे डंडुर कपरा वितरण कैना मजा काम रहल बटैनाके साथे कोभिड १९ से सचेत रहे परना बाट बट्वाइल रहिट । ओस्टके कार्यक्रममे आपतकालिन कोषके अध्यक्ष सुशील चौधरी आपतकालिन कोष मार्फत आपत विपत परल बेला सक्कुजहनहे सेकटसम सहयोग करना तत्पर रहल बटैलै ।

कार्यक्रममे बढैयाताल गाउँपालिका वडा नं. ८ के कार्यालय, विद्या ज्योति नमुना माध्यामिक विद्यालय कण्ठपुर, साना किसान कृषि सहकारी संस्था लिमिटेड.कालिका, कालिका बचत तथा ऋण सहकारी संस्था लिमिटेड ओ दीपलगन महिला बहुउद्देश्यीय सहकारी संस्था लमिटेडलगायतके.सहकार्य रहल रहे ।

संस्थाके बालकक्ष संयोजक पवित्रा अर्यालके अध्यक्षतामे कार्यक्रम हुइल रहे कलेसे कार्यक्रम संचालन पुस्तकालयके सदस्य शोभा अधिकारी करले रहिट ।