कन्द्रा लडियाके पुल निर्माणमे ढिलासुस्ती
साढे दुई बरसमे निम्जना पुलके नौ बरसमे ६० प्रतिशत काम
पहुरा समाचारदाता
धनगढी, १८ पुस । कैलालीके भजनी नगरपालिका–३ स्थित कन्द्रा लडियामे पुल निर्माण सुरु हुइल नौ बरस बिटल बा । नौ बरससम पुलके ६० प्रतिशत किल निर्माण सम्पन्न हुइल निर्माण कम्पनी जनैले बा ।
हुलाकी राजमार्गअन्तर्गत बने लागल पुल निर्माण विसं २०६८ से सुरु हुइल हो । पुल निर्माण सम्पन्न नाइ हुइलपाछे उहाँके नागरिकहुक्रनहे पुलसे आवतजावत कैना सपना अधुरे बा । पुल साढे दुई बरसमे निर्माण सम्पन्न कैना मेरके बिरुवा लामासाल्पा शेर्पा कम्पनी ठेक्का लेहल मने नौ बरस बिट्लेसे फेन पुल बने सेकल नाइहो ।
चार स्पान ओ पाँच पिलर रहल पुलके नौ बरस बिट्लेसे फेन एकठो स्पान ओ चार पिलर किल निर्माण हुइल बा । निर्माण सुरु हुइल लम्मा समयसम फेन पुल नाइ बनके उहाँके नागरिकहे आवतजावत कैना ढिउर समस्या हुइले भजनी नगरपालिका–३ के सीताराम चौधरी बटैठै ।
‘पुल नाइ हुइल कारण यहाँके नागरिकहे लडिया नाघ्ना ढिउर समस्या हुइल बा । सक्कु जनहनहे कर्रा बा । लडिया नाघ्क लाग लाउ नाघे पर्ना समस्या बा,’ सीताराम कहठै्, ‘बालबालिकाहे विद्यालय आउजाउ कैना आउर समस्या बा । कबुकाल रातके फेन नेंगे पर्ना रहठ् । रातके लाउ कैसिक नाघ्ना हो ? पुल नाइ होके ढिउर दुःख पागैल ।’
भजनी नगरपालिकाके वडा नम्बर ५ ओ ७ के स्थानीयवासीहे नगरपालिकामे आइक लाग उ लडिया नाघे पर्ना रहठ् । लडिया नाघक लाग ढिउर समस्या हुइना करल वडा नम्बर ७ के श्यामलाल थारू बटैठै । ‘हम्रहीनहे सबसे ढिउर पीडा लडिया नाघ्ना रहल बा । दुःख बिमार हुइल बेला हम्रे भजनी जाइ नाइ सेक्ठी । आपतकालीन अवस्थामे रातके समयमे लडिया नाघे नाइ सेकजाइठ्,’ श्यामलाल कहलै, ‘कुहीहे सुत्केरी व्यथा लागलमे हम्रे रातके अस्पतालसम पुगाइ नाइ सेकठी । पुल बन्ना आशा फेन मरल नाइ मरल हो ।’
लम्मा समयसम पुल नाइ बनके भजनीके किल नाइहोके हुलाकी राजमार्ग फेन गति कम हुइल बा । राजमार्ग सञ्चालनमे समस्या हुइल बा । अइसीक घरी घरी थपल म्यादमे फेन काम नाइ कैना ठेकेदार कम्पनीहे कारवाही करे पर्र्ना स्थानीय जयबहादुर बुढाके माग बा ।
‘समयमे निर्माण ओराइ पर्ना हो, नौ बरससम पुल निर्माणके नाउँमे फाइदा लेना निर्माण व्यवसायीहे सरकारसे कारवाही करे परल,’ उहाँ कहठै, ‘सम्झौता रद्द कैके औरे कम्पनीहे डेके काम ओराइ परल । नागरिकहे ढिउर कष्ट हुइल समस्या समाधानमे स्थानीय सरकारसे पहल करे परल ।’
बिरुवा लामा साल्पा शेर्पा कम्पनी आपन ओरसे कौनो लापरवाही नाइ हुइल प्रतिक्रिया डेले बा । सुरुमे डिजाइन परिवर्तन होके ढिलाइ हुइल ओ पाछे साझेदारसे काम नाइ कैके ढिलाइ हुइलेसे फेन अब्बे काम जारी रहल निर्माण कम्पनी जनैले बा । कोराना महामारीके कारण कुछ समस्या अइलेसे फेन यी आर्थिक बरसभित्रे पुल निर्माण सम्पन्न हुइना कम्पनीके साइड प्रतिनिधि नगेन्द्र रावत बटैलै ।
‘पहिल बरस विवाद होके काम करे नाइ सेकगैल,’ रावत कहलै, ‘यी बरस निर्माण सेकब । यिहीसे आघे ज्या हुइल हुइल, आब यी बरस सेक्ना मेरके काम कैटी रहल बाटी ।’ हुलाकी राजमार्ग आयोजना कार्यालय धनगढीके अनुसार चार करोड ४२ लाख लागतमे पुल निर्माणके म्याद थप करटी २०७७ माघसम पुगाइल बा ।
भौतिक पूर्वाधार निर्माणके ठेक्का सम्झौता कैके समयमे काम सम्पन्न नाइ कैना निर्माण कम्पनीहे कानूनी दायरामे लानके कारवाही नाइ करटसम यी मेरके समस्या अइटी रहना स्थानीयवासी बटैठै ।
