मुख्य योजनाकार राना कारागार चलान
पहुरा समाचारदाता
धनगढी, १८ पुस । कैलालीके धनगढी उपमहानगरपालिका–१२ स्थित जुगेडा अस्थायी प्रहरी पोष्टमे कार्यरत दुई प्रहरी हत्याकाण्डके मुख्य अभियुक्त सुक बहादुर कना अमर रानाहे पुर्पक्षके लाग कारागार चलान करल बा ।
बिफेक रोज जिल्ला अदालत कैलालीमे हुइल थुनछेक बहसपाछे हुइल आदेशअनुसार रानाहे पुर्पक्षके लाग कारागार चलान करल जिल्ला प्रहरी कार्यालयके प्रवक्ता प्रहरी नायब उपरीक्षक प्रतीक बिष्ट बटैलै ।
रानाहे अँट्वारके पक्राउ कैके प्रहरी सोम्मारके पत्रकार सम्मेलन मार्फत सार्वजनिक करल रहे । उहाँहे सीमा क्षेत्रसे पक्राउ करल हो ।
घटना हुइल अढाई महिनापाछे प्रहरी उहाँहे पक्राउ कैना सफल हुइल रहे । नियमित गस्तीमे खटल प्रहरी सहायक निरीक्षक गोविन्द विक ओ जवान रामबहादुर साउँदके गत कार्तिक १ गते निर्मम हत्या हुइल रहे । हत्याके आरोपमे यिहीसे आघे पक्राउ परल ८ जनहनहे फेन पुर्पक्षके लाग कारागार चलान होसेकल बाटै ।
