अन्योलमे छ करोड बजेट

समुदायमे विवादके रेखा बह्रटी

उन्नती चौधरी
धनगढी, १८ पुस । कैलालीस्थित लम्कीचुहा नगरपालिका ओ संघीय बजेटसे बलचौर बादी बस्तीमे आर्थिक बरस २०७५/०७६ मे जनता अवास कार्यक्रम अन्तर्गत १० करोड बजेट विनियोन हुइल रहे ।

उ रकमसे १४८ घरधुरीके लाग एकीकृत बस्ती निर्माण कैना सम्झौता हुइल पश्चात २०७७ सम आपुगटसम जम्मा ४५ ठो घर किल सम्पन्न हुइल बा । १०३ घर आभिनसम अन्योलमे रहल बा । उपभोक्ता समितिके अनुसार १० करोडसे ३ करोड ६४ लाख रुपैयाँ किल निकासा हुइल बाँकी रकम कोरोनाके कारण डेखाके हालसम रोक्का करल बा ।

बस्तीके अगुवा तथा सुदूरपश्चिम प्रदेश बादी उत्थान समितिके सचिव नन्दराम बादीके अनुसार ३ बरसमे साढे ३ करोड बराबरके लागतके ४५ ठो घर निर्माण हुइल, बाँकी घरके लाग बजेट निकास हुइ कि नाइ कना अन्योल रहल बा ।

उहाँ कहलै, ‘सरकारसे कोरोनाके कारण डेखाके बजेट रोक डेले बा । अब्बे सरकार अपने खिचातानीके अवस्थाम बा, खै बाँकी बजेट आइठ् कि नाइ आइठ् शंका लागठ् ।’ घर पाइल ४५ घरधुरीके परिवार लावा घरमे बैठे लागलपाछे कच्ची घरमे बैठ्टी आइलहुक्रे विवाद कैना शुरु करसेकल उहाँ बटैलै ।

उहाँ कहलै, ‘अब्बेसम बजेट आइठ् कि कहिके बात मिलैटी रहल बाटी, यदि यी बस्तीमे सक्कु जाने घर नाइ पैही कलेसे भर बरवार विवाद हुइ सेक्ना सम्भावना डेखजाइठ् । काहे कि १० प्रतिशत श्रमदान समुदायके फेन बा ।’ नन्दके अनुसार सरकारसे माघसम बजेट डेना अश्वासन डेहल ओरसे समुदायके मुख बन्द कैना सजिल हुइल बटैलै ।

२०६३ सालसे बसोबास करटी आइल उ बस्तीके कुछ परिवारमे खुशी डेखजाइठ् कलेसे, कोइ दुःखी । ‘घर पउइया टे पैलै, हम्रे कहाँ जैना ? पुस महिनाके ठेठुर्ना जारमे न डंठुर लुगरा हो, न मजा घर,’ उहे बस्तीके एक सदस्यके कहाइ हो इ ।

उहाँ कहलै, ‘इ परियोजना समयमे निम्जट कलेसे भर मिलल् बस्तीमे आगी नाइ लागट ।’
बादी बस्ती लम्की चुहा नगरपालिका वडा नम्बर ३ मे परठ् । उहे वडाके महिला सदस्य पार्वती बादी कहली, ‘यी बस्तीमे बसोबास करुइयाहुक्रे तीन मेरके बाटै । कोइ घुमन्ते मगन्ते
(गीत गैना, मन्द्रा बजैना ओ नच्ना) कोइ गिट्टी कुट्ना ओ कोइ वैदेशिक रोजगार । आय श्रोत इहे हो ।’

उहाँ नगरपालिका यहाँके समुदायके जीवन स्तर उकासक लाग स्वाथ्य, शिक्षा, विद्युतके सुविधा करडेहल बटैलै, मने उच्च शिक्षाके ग्यारेन्टि कैना आवश्यक रहल बटैली ।

सरकारसे प्रति घरधुरी दुई कठ्ठाके दरसे जग्गा नाप कैके कित्ताकाट करडेहल बटैटी एकीकृत बस्ती निर्माणके लाग बाँकी बजेटमध्ये १ करोड रकम माघसम निकासा हुइना सूचना पाइल बटैलै । जौन रकमसे १४÷१५ ठो घर किल निर्माण हुइ ओ समुदायमे औरे विवाद हुइ सेकी । यहाँ बसोबास करुइया समुदायमे स्थायी रोजगारी नाइहो ।

वैदेशिक रोजगारके लाग फेन उमेरके हदबन्दी बा, जिहीसे समुदायहे अपने आत्मनिर्भर बने सेक्ना खालके योजना लन्ना पहल करटी रहल वडा सदस्य बादी बटैली ।

नगरपालिकासे कोभिडसे रोजगारी गुमेलहुक्रनहे कृषि कार्यक्रममे अनुदान डेना योजना समेत लन्ले बा, मने यी समुदायसंग जग्गा नाइ हुइल कारण काम कैना समस्या । छोट छोट बातसे समुदायमे विवाद आइ नाइ डेना ढिउर सकस करे परल वडा सदस्य बटैली ।