पूर्वकमलरी रजनीके महिनक कमाही ७५ हजार

६ जनहनहे रोजगारी, भविष्यमे टेलरिङके कुशल प्रशिक्षक बन्न लक्ष्य

पहुरा समाचारदाता
धनगढी, २० पुस । औरेक घर काम करके पह्रना ढेर गाह्रो हुइल पूर्व कमलरी रजनी चौधरी कहठी । ‘घरेक आर्थिक अवस्था कम्जोर हुके कक्षा ७/८ मे पह्रेबेर अपने गाउँमे दुई बरस कमलरी बैठनु, ओकर टन्खा गुजरे नइचले ।’ कैलाली जिल्ला बर्दगोरिया गाउँपालिका वडा २ झगरपुरके रजनी चौधरीके डाई बाबा मुक्तकमैया हुइन ।

‘घरेक आर्थिक अवस्था एकदम कम्जोर हुके पहिले खैना लगैना गाह्रो रहे,’ रजनी चौधरी कहठी– ‘कक्षा ७ ओ ८ मे पह्रेबेर गाँउमे कमलरी लग्नु, घरेक काम करके पह्रना बहुट गाह्रो हुइल ।’

डाई बाबा मुक्त कमैया हुइलक ओेरसे दुई डाडु ओ महीहे छात्रावृतिमे एसएलसीसम पह्रना मौका जुरल रजनी कहली, ‘हम्रे छोट–छोट रही, डाईबाबा ओटरा नइजन्ना रहिट, कमैयाके लगत लेकेबेर मुक्तकमैया परिचय पत्रसेफे बञ्चित हुइलै, ठोर ठार कमाईल पैसासे पाँच कटठा ऐलानी जग्गा केल जोरगैल ।

बौनियाँके बसन्त मुरारी माविमे ०६९ सालमे एसएलसी डेनु मने परिक्षा विगरलपाछे २ बरष खाली बैठके टेलरिङके काम सिख्नु रजनी कहली । मुक्तकमलरी हुइलक ओरसे व्याकवार्ड सोसाइटी एजुकेशन (बेस) कैलाली ओ टीकापुर कञ्चन ट्रेड सेन्टरसे ३/३ महिने निःशुल्क टेलरिङके तालिम लेना मौका मिलल उहाँ कहली । पहिल चरण ओ दुसराके चरणके सिटीइभिटीईके तालिम पाइल रजनी चौधरी बटैठी ।

गल्र्स ट्रान्जिप्ट फन्ड मार्फत सुखडमे रहल घोडाघोडी नकरोड सहकारी संस्था लिमिटेडसे ढेड लाख रुप्या व्यावसयिक लोन लेके २०७३ सालसे टेलरिङके व्यावसाय सुरुवाट करल उहाँ बटैठी । व्यावसाय फस्टैटी गैलपाछे पहिल चो लेहल लोन चुक्ता कैसेकलपाछे दुसरा चरणमे फेरसे ढाई लाख लोन लेके व्यावसाय बह्राईबेर टेलरिङ पसलमे ६ जाने प्रत्यक्ष रोजगारी पाइल रजनी बटैठी ।

‘यी व्यावसायसे सिजन अन्सार ६० से लेके ७५ हजार मसिक आम्दानी हुइठ, उहाँ कहली, मोर पसलमे काम करुइया पीसके हिसाबसे पैठै, ओइनकेफे मासिक ८÷९ नौ हजार रुप्या बन्जैठिन ।’
व्यावसाय दिनदिने मजा हुइटी गैलपाछे सहकारीसे लेहल लोनके किस्ता टिर्ना गाह्रो नइरहल ओ अब्बेसम २४ किस्ता मन्से ४ चार किस्ता टिरसेकल रजनी बटैठी ।

व्यावसायसंगे अब्बे फेरसे पह्राईहे निरन्तरता डेटी यी बरससे बौनियाँमे रहल बसन्त मुरारी माविमे फेरसे कक्षा नौ भर्ना हुइल उहाँ बटैली ।

उहाँ कहली, ‘पहिले घरेक आर्थिक अवस्था कम्जोर हुके मजासे पह्रे नइमिलल, आब व्यावसायसंगे समय मिलाके पह्राईहेफे निरन्तरता डेहटु ।’ भविष्यमे टेलरिङके मजा प्रशिक्षक बन्ना लक्ष्य रहल रजनी बटैठी ।

गल्स ट्रान्जिप्त फन्ड का हो, किहीहे सहयोग करठ ?

युकेएडके आर्थिक सहयोगमे मर्सिकोर नेपाल ओ बेस कैलालीसे सञ्चालित सीमान्तकृत बालिकाहरुको शिक्षामा सहयोग (स्टेम) परियोजनासे २०६६ साल यहोर आर्थिक कारण विद्यालय छोरल बालिकाहुकनके व्यवसायके लाग संचालन कैगिल घुम्टी कोष हो ।

जिहीहे गल्र्स ट्रान्जिसन फन्ड कहिके जानजाइठ ओ कैलालीके चार ठो सहकारीसे ३ करोड २० लाख रुप्या छुटयाइल बा । जौन रुप्या सीमान्तकृत बालिकाहुकनके व्यावसाय तथा शिक्षाके लाग प्रयोग करे सेक्ना कहल बा ।

उ रुप्या सीमान्तकृत बालिका ८ प्रतिशत व्याजरमे विना धितो व्यावसयिक लोन डेके व्यावसाय करिट कहिके छुटयाइल बेस कैलालीके जिल्ला कार्यक्रम संयोजक लक्ष्मण चौधरी बटैठै । गल्र्स ट्रान्जिसन फन्ड मार्फत चार सहकारीसे व्यावसायिक लोन लेके अब्बेसम ३५० बालिका व्यवसाय करटी रहल उहाँ जनैलै ।