कटैनी पुलमे खट्हा परके दुर्घटनाके सम्भावना

पहुरा समाचारदाता
हसुलिया, २० पुस । कैलारी गाउँपालिका वडा नं ५ कटैनीपुलमे खट्हा परके दुर्घटनाके सम्भावना बर्हल बा ।

सवारीके चाप बर्हलपाछे पुलके पुरुब ओर खट्हा परल बा । पुलके पुरुब ओरके स्पामहे पटानी करल माटी ढँसके खटहा परल स्थानीय प्रर्विन बौखाही जानकारी डेलै ।

दिनके सयौँ सवारी साधन ओहोर डोहर कैना पुलहे समयमे मर्मत नाइ करलेसे बरवार दुर्घटना हुइना उहाँ बटैलै । उहाँ पुलके मर्मतके लाग उहाँ समयमे सम्बन्धित निकायके ध्यान जैना आवश्यक रहल औँल्याइलै ।

हुलाकी सडकके स्त्तरोन्नतिके कार्य सुरु हुइलसंगे ओम्ने लोड हुइल टिप्पर नेंगके पुलमे खटहा परल जनाइल बा ।

कुछ महिना आघे धनगढी उपमहानगरपालिका ओ कैलारी गाउँपालिका जोर्ना घुरहा पुलमे फेन खट्हा परके दुर्घटनाके जोखिम बह्रल रहे । ओकर मर्मत करल पाछे सवारी आवागमनमे सहजता ओ दुर्घटना हुइना जोखिम फेन कम हुइल बा ।