थारु साहित्यिक अन्तरक्रिया कार्यक्रम निम्जल
पहुरा समाचारदाता
सुर्खेत, २० पुस । जंग्रार साहित्यिक बखेरी, सुर्खेत शाखासे लावायुवा थारु साहित्यकार एवम बुद्धिजीविहुक्रन बीच थारु साहित्यके विविध विधामे लेखन सिपबारे प्रशिक्षण कार्यक्रम चलैले बा ।
उहे क्रममे कथाबारे साहित्यकार मानबहादुर चौधरी पन्ना, गजल लेखन सिपबारे गजलकार तथा साहित्यकार सोम डेमनडौरा तथा निबन्ध ओ डायरी लेखनबारे लेखिका बालिका चौधरी प्रशिक्षण डेहल रहिट ।
उ कार्यक्रमे सुर्खेतमे रहिके थारु साहित्य, संस्कृति संरक्षणमे महत्वपूर्ण भूमिका खेल्टी आइल जंग्रार साहित्यिक बखेरीके केन्द्रीय अध्यक्ष सोम डेमनडौराहे मयााके चिनोसहित बिदाइ करल रहे । अध्यक्ष डेमनडौरा विगत एक बरससे इन्सेक कार्यालय सुर्खेतमे रहिके काम करटी आइल रहिट । हाल उहाँ सुर्खेतसे सरुवा हुइ लागलपाछे कार्यक्रम आयोजना करल जंग्रार साहित्यिक बखेरी,सुर्खेत शाखाके जितबहादुर चौधरी बटैलै ।
कार्यक्रममे थारु कल्याणकारिणी सभा सुर्खेतके सल्लाहकार जागुराम थारु आपन भाषा, साहित्य संस्कृतिप्रति हम्रे अपनहे एकजुट हुइ पर्ना जोड डेलै । थारु नागरिक समाज कैलालीके संयोजक दिलबहादुर चौधरी आबे भाषा संस्कृति बचैना जिम्मा युवा लेहे पर्ना बटैलै । थारु भाषा लोप हुइना स्थितिमे रहल ओरसे सक्कु युवालोग कलम चलाइ पर्र्ना जरुरी रहल औँल्याइल रहिट ।
थारु बुद्धिजीवि सनिसरा महत्तमसे सुर्खेतमे रहल लखागिन साहित्य श्रृङ्खला मार्फत सांस्कृतिक अभियान चलैटी लोप रहल गीत सखिया नाच, मघौटा नाच लगायत पुस्तक प्रकाशन कैके दस्तावेजीकरण नाइ करटसम हमार संस्कृति धरापमे परे सेक्नामे चिन्ता व्यक्त करल रहिट ।
कार्यक्रममे आइएनएफके प्रमुख मंगल थारु, विश्व शिक्षा कार्यक्रमके निराजन चौधरी लगायत शुभकामना मन्तव्य राखल रहिट ।
कार्यक्रममे टमान नव स्रष्टाहुक्रे लखागीन साहित्यवाचन तेश्रो श्रृंखलाअन्तर्गत गजल, कविता वाचन फेन करल रहिट । विदाइ तथा अन्तरक्रिया कार्यक्रम जंग्रार साहित्यिक बखेरी सुर्खेतके संयोजक मानबहादुर चौधरी पन्नाके घरगोस्याइमे सम्पन्न हुइल रहे ।
