भूमिहीन सुकम्बासी लगत संकलन इकाई कार्यालय स्थापना

पहुरा समाचारदाता
धनगढी, २० पुस । धनगढी उपमहानगरपालिकासे सोम्मारके सुकम्वासी लगत संकलन इकाई कार्यालय स्थापना करले बा ।

धनगढी उपमहानगरपालिकाके प्रमुख नृपबहादुर वड, उपप्रमुख सुशीला मिश्र भट्ट कार्यालयके उद्घाटन करल हुइट । कार्यालय धनगढी उपमहानगरपालिका वडा नम्बर ५ मे करल बा । जग्गा हस्तान्तरणके प्रकृया सुरुक करक लाग भूमिहीन सुकम्वासी ओ अव्यवस्थित बसोवासीके पहिचान, लगत संकलन ओ प्रमाणीकरणके सक्कु काम इहे कार्यालयसे संचालन हुइना नगरप्रमुख नृपबहादुर वड बटैलै ।

धनगढी उपमहानगरपालिकासे कानुनमे व्यवस्था हुइल अनुसार स्थानीयतहके सहजीकरण समितिसे काम सुरु करले बा नगरप्रमुख नृपबहादुर वड कहलै– ‘नगरमे रहल भूमिहीन सुकम्वासी ओ अव्यवस्थित बसोवासीके पहिचान, लगत संकलन ओ प्रमाणिकरण कैके जग्गा हस्तान्तरण करजैना बा ।’ नगरप्रमुख वड विवाद रहित ढंगसे काम सुरु कैना इकाईमे खटल कर्मचारीहे निर्देशन डेलै ।

लगत संकलन इकाई कार्यालके लाग जनशक्तिके व्यवस्थापन करसेकल बा, नगरप्रमुख वड कहलै– ‘आजसे काम सुरु होसेकल बा ।’ ‘सुकम्वासी भूमीहिनहे जग्गा धनी पूर्जा डेना ओ अव्यवस्थित बसोवासहे व्यवस्थापन कैना सक्कु पार्टीसे चुनावी घोषणापत्रमे राखल रहे, नगरप्रमुख वड कहलै– ‘नगरवासी संग करल प्रतिवद्धता हाली हुइना बा ।’

धनगढी उपमहानगरपालिकाके उपप्रमुख सुशीला मिश्र भट्ट भूमिहीन सुकम्वासी ओ अव्यवस्थित बसोवासीके पहिचान, लगत संकलन ओ प्रमाणिकरण ओ लालपुर्जा हस्तान्तरण कैना कार्यमे सक्कु पक्षके सहयोग आवश्यक रहल बटैली । उहाँ कहली– ‘पाइल जिम्मेवारी स्थानीयतहसे पुरा कैना बा ।’

धनगढी उपमहानगरपालिकाके प्रमुख प्रशासकिय अधिकृत जगन्नाथ पन्त भूमिहीन सुकम्वासी ओ अव्यवस्थित बसोवासीके पहिचान, लगत संकलन ओ प्रमाणिकरण कैना काम हाली आघे बह्रना बटैलै ।

धनगढी उपमहानगरपालिका वडा नम्बर ५ के अध्यक्ष हिरासिंह पातली ऐलानी ओ प्रति जग्गामे बैठलहुक्रनहे उमहानगरपालिकासे सक्कु सेवा सुविधा डेके फेन करके दायरामे लाने नाइ सेकल बटैलै । उहाँ कहलै–‘आब इ काम सम्भव हुइना बा ।’

भूमिसम्वन्धी समस्या समाधान आयोग स्थानीयतह समन्वय समितिके सदस्य पुष्कल कर्माचार्य समितिसे हालीसे हाली पुरा कैना मेरके काम सुरु करल बटैलै ।