काठ सहित टेक्टर ओ मनै पक्राउ

पहुरा समाचारदाता
धनगढी, २१ पुस । कैलाली जोशीपुर गाउँपालिका–१ राजीपुरस्थितमे रहल शंकर सामुदायिक वन लग्गे सडकसे अबैध रुपमे से १ त ४९६२ नं. ओ नम्वर नइखुलल १ करके २ ठो टेक्टरमे ढाराल सेमरक कठुवा सहित पाँच जाने पक्राउ परल बटै ।

ईलाका प्रहरी कार्यालय भजनीसे खटल प्रहरी टोली भजनी नगरपालिका–२ बैठना बर्ष ३२ के कृष्णलाल डगौरा, बर्ष ३० के बिर बहादुर डगौरा, बर्ष २१ के नबिन चौधरी, बर्ष ३० के बुधराम चौधरी ओ वडा नम्बर ६ बैठना बर्ष १९ के महेश चौधरीहे पक्राउ करल जिल्ला प्रहरी कार्यालय कैलालीके प्रहरी नायव उपरिक्षक प्रतिक विष्ट बटैलै । आवश्यक कार्वाहीके लागी सब डिभिजन बन कार्यालय भजनीमे बुझाइल उहाँ जनैलै ।

ओस्टेक गैल १९ गते २ स्थानसे काठ सहित टेक्टर ओ दुई वटा मोटरसाईकल बरामद हुइल रहे । सुदुरपश्चिम प्रदेश प्रहरी कार्यालय दिपायल, ईलाका प्रहरी कार्यालय भजनी ओ जोशीपुरसे खटल प्रहरी टोली जिल्ला कैलाली जोशिपुर गाँउपालिका वडा नं. ७ भगतपुरस्थित से.१ त. ८७२ नं.के टेक्टरके पाछे छाडी डल्लव जडान करके डल्लवमे चार ठो साल जातके १६.२७ क्यूफिट रहल काठके गोलीया नन्टी रहल अवस्थामे प्रहरी टोली डेख्टीकी टेक्टर चालक टेक्टर छोरके भागके फरार हुइल ओ टेक्टर, काठ बरामद करके आवश्यक कार्वाहीके लाग सब डिभिजन वन कार्यालय भजनीमे बुझाइल बा ।

ओस्टेक ईलाका प्रहरी कार्यालय भजनीसे खटल प्रहरी टोली जिल्ला कैलाली जोशीपुर गा.पा. वडा नं.०३ स्थित से.२ प.५४२८ नं. ओ से.१ प.८७५९ नं.के मोटरसाइकलमे ५ फिट लम्बाई ५.५ फिट गोलाई ओ ५ फिट लम्बाई ३.४ फिट गोलाई हुइल सालके गोलिया लोड करल अवस्थामे फेला पारके मोटसाइकल तथा काठ बरामद करके आवश्यक कार्बाहीके लाग सब डिभिजन वन कार्यालय भजनीमे बुझाइल बा ।