थारु गाउँमे माघक तयारी तीब्र
पहुरा समाचारदाता
धनगढी, २२ पुस । थारु समुदायके लावा बरस माघके लाग कैलालीके थारु गाउँमे तयारी सुरु हुइल बा ।
थारु समुदायके सबसे बरवार टिहवार रहल ओरसे अँठ्दिन आघेसे नै तयारी करल हो । अब्बे थारु समुदायके मनै माघके लाग आवश्यक पर्ना सामानके व्यवस्था कैना कार्यमे जुटल बाटै । थारु समुदाय पुस अन्तिम दिनसे माघ २ गतेसम तीन दिन धुमधामसे माघ मनैना करल बाटै । माघ १ गतेसे थारु सम्वत सुरु हुइना करठ् ।
माघ लच्क्यइटी रहल बेला गाउँघरमे आवश्यक तयारी सुरु हुइल भजनी नगरपालिका–२, मोहनपुरके स्थानीय गंगाराम चौधरी बटैलै । ओहकान अनुसार काठीपाटा संकलन, पटिया टुरके डोना टेपरी बनैना, कुटानीपिसानी लगायतके कार्य धमाधम हुइटी रहल बावै ।
माघमे चाउरक पिठाके ढिक्री खैना करजाइठ् । ओकर लाग कुटानीपिसानीके काम धमाधम हुइटी रहल हो । ओस्टके, आवश्यक सरसामान खरिदके लाग मेलापात फेन हुइटी रहल स्थानीय चन्द्रप्रसाद चौधरी बटैलै ।
‘इ बेला थारु बस्ती माघक तयारीमे जुटल बाटै,’ उहाँ कहलै, ‘ढिरेसे माघक चहलपहल सुरु हुइल डेखे सेकजाइठ् ।’
गतविगतमे माघके अवसरमे टमान स्थानमे हप्तादिन आघेसे नै मेला, महोत्सव आयोजना हुइना करल रहे । मने यी बरस कोरोना महामारीके कारण मेला महोत्सव लगाइल नाइहो । यद्यपि, महत्वपूर्ण टिहुवार रहल ओरसे गाउँघरमे रमाके मनाइक लाग आवश्यक तयारी हुइटी रहल चौधरी उल्लेख करलै ।
माघ टिह्वारपाछे थारु समुदायमे भोज, लावा काम लगायतके कार्यके थालनी हुइना करठ् । इ टिह्वारमे गाउँके नेतृत्व कैना भलमन्सा फेन चयन कैना करल जनाइल बा ।
