प्रधानमन्त्रीके सुरक्षाके लाग हाई अलर्ट
एक हजार सुरक्षाकर्मी परिचालन कैना, करिया झण्डा, व्यानर ओ मास्क प्रतिबन्ध
पहुरा समाचारदाता
धनगढी, २२ पुस । प्रधानमन्त्री केपी शर्मा ओलीसे सम्बोधन हुइना आमसभाके लाग व्यापक सुरक्षा तयारी करल बा ।
नेकपासे इहे पुस २४ गते धनगढीमे आयोजना हुइना आमसभाहे सम्बोधन करे प्रधानमन्त्री तथा पार्टी अध्यक्ष केपी शर्मा ओली अइना हुइलपाछे व्यापक सुरक्षा तयारी करल जनाइल बा । संसद बिघटनपाछे पहिलचो उपत्यका बाहर जनताहे सम्बोधन करे उहाँ सुदूरपश्चिम अइटी रहल बाटै । ओहेमारे प्रधानमन्त्री ओलीके आमसभाके सुरक्षाके लाग व्यापक सुरक्षा तयारी हुइटी रहल जनाइल बा ।
ओकर लाग धनगढीमे बुधसे सुरक्षा व्यवस्था कडा पारल बा । प्रधानमन्त्रीके सुरक्षाके लाग ढिउर संख्यामे सुरक्षाकर्मी परिचालन कैना तयारी हुइल सुदूरपश्चिम प्रदेश प्रहरी कार्यालय जनैले बा । प्रदेश प्रहरी कार्यालयके प्रमुख डिआइजी उत्तमराज सुवेदी प्रधानमन्त्रीके सुरक्षाके लाग थप प्रहरी परिचालन हुइना बटैलै ।
ओहकान अनुसार प्रधानमन्त्री ओली तथा आमसभाके सुरक्षाके लाग पुस २४ गते करिब एक हजारके हाराहारीमे सशस्त्र प्रहरी ओ नेपाल प्रहरी परिचालन करजैना बाटै । झण्डे सयके हाराहारीमे सादा पोशाकमे प्रहरी खटजैना बाटै । ‘संसद विघटनपाछे प्रधानमन्त्री पहिलचो उपत्यका बाहर अइटी बाटै । अब्बेके परिस्थीतीहे मध्यनजर करटी सुरक्षा व्यवस्था कडा बनाब,’ सुवेदी कहलै ।
जिल्ला सुरक्षा समिति कैलाली फेन प्रधानमन्त्रीके सुरक्षा तथा आमसभा स्थलमे अप्रिय घट्ना हुइ नाइ डेना रणनीति बनैटी रहल बा । प्रचण्ड–माधव नेपाल समूहके नेता कार्यकर्ता प्रधानमन्त्रीके विरोध करे सेक्ना कहटी उ कार्य हुइ नाइ डेहक लाग सुरक्षा निकायहे हाई अलर्ट करल हो ।
कैलालीके प्रमुख जिल्ला अधिकारी यज्ञराज बोहरा प्रधानमन्त्री ओलीके सुरक्षाके लाग व्यापक सुरक्षा तयारी करल ओ थप आवश्यक रणनीति बनाइल बटैलै ।
आमसभा स्थल आँजरपाँजर तथा प्रधानमन्त्री ओली आवात जावत कैना सडकमे कौनो फेन मेरके बिरोध तथा अबरोध करे नाइ डेना सुरक्षा निकाय हाई अलर्ट करल बा । प्रधानमन्त्री ओलीसे सम्बोधन हुइना आमसभामे नेकपा प्रचण्ड–नेपाल समूहसे बिरोध तथा अबरोध कैना जानकारी पाइलपाछे सुरक्षा निकाय हाई अलर्ट रहल हो ।
आमसभा स्थल तथा प्रधानमन्त्री आवात जावत कैना सडक क्षेत्रमे करिया व्यानर, करिया मास्क ओ करिया झण्डामे प्रतिबन्ध लगाजैना बा ।
