भीम रावल सहित ३ नेताहे कारवाही
पहुरा समाचारदाता
धनगढी, २३ पुस । नेकपा सुदूरपश्चिमके इन्चार्ज भीम रावल सहितके ३ जाने नेताउपर कारवाही कैना सिफारिस करले बा ।
बुधके धनगढीमे बैठल नेकपा सुदूरपश्चिम (ओेली समूह) के बैठकसे पार्टी इन्चार्ज रावलहे बर्खास्त करटी आवश्यक कारवाहीके लाग केन्द्रीय कमिटिहे सिफारिस कैना निर्णय करल हो । बिफेक रोज धनगढीमे पत्रकार सम्मेलन मार्फत कारवाहीके लाग सिफारिस करल नेकपाके प्रदेश अध्यक्ष कर्ण थापा जानकारी डेलै ।
रावल बैँक खातामे रहल ३० लाख रुपैयाँ गायब पारल कहटी आर्थिक अनियमितता करल ओरसे पार्टीके विधान बमोजिम कारवाही कैना सिफारिस करल हो । ओस्टके ओली समूहसे नेकपा सुदूरपश्चिमके प्रदेश सचिव नेपबहादुर चौधरी ओ कार्यालय सचिव दिनेशचन्द्र सुवेदीहे फेन कारवाही करल जनाइल बा ।
यिहीसे आघे नेकपा प्रचण्ड–नेपाल समूहसे नेकपाके प्रदेश अध्यक्ष कर्ण थापाहे फेन कारवाही कैना सिफारिस करल रहे । कलेसे नेकपा कैलालीके अध्यक्ष रतन थापा सहितके ८ जाने नेताहे समेत कारवाही करल रहे ।
ओहे बिच प्रधानमन्त्रीसे सम्बोधन हुइना आमसभाके सक्कु तयारी पुरा हुइल जनाइल बा । नेपाल कम्युनिस्ट पार्टी नेकपा प्रदेश कमिटीसे आयोजना करल जनसभाहे सम्बोधन करे प्रधानमन्त्री ओली पुस २४ गते शुकके ११ बजे धनगढी अइटी रहल बाटै । कार्यक्रमके तयारीके लाग नेकपा सुदूरपश्चिमके अध्यक्ष कर्ण थापाके संयोजकत्वमे २५ सय २५ जनहनके मूल समिति बनागिल रहे । ओस्टके ७ ठो उपसमिति बनाके आमसभाके सक्कु तयारी पुरा हुइल जनाइल बा ।
आमसभामे हरेक स्थानीय तहसे व्यापक जनताके सहभागिता करैना जनाइल बा । कार्यक्रमके लाग केन्द्रीय नेता तथा मन्त्री कैलाली पुगसेकल बाटै । नेकपाके सुदुरपश्चिम संयोजक एवम् उद्योग वाणिज्य तथा आपूर्ति मन्त्री लेखराज भट्ट, वन मन्त्री प्रेम आले, श्रम मन्त्री गौरी शंकर चौधरी, सामान्य प्रशासन मन्त्री गणेश सिंह ठगुन्ना कुछ दिन आघे धनगढी आसेकल बाटै ।
उद्योग वाणिज्य तथा आपूर्ति मन्त्री ओ श्रम मन्त्री चौधरी ओ प्रदेश अध्यक्ष थापा सोम्मारके धनगढी पुगल हुइट कलेसे वन मन्त्री आले ओ सामान्य प्रशासन मन्त्री ठगुन्ना मंगरके पुगल हुइट ।
