सिमसारमे जलपंक्षीके गणना

पहुरा समाचारदाता
धनगढी, २४ पुस । सुदूरपश्चिम प्रदेशके टमान सिमसारमे जलपंक्षीके गणना करजैटी बा ।

हिउँदमे बसाइँ सरके यहोर अउइया पाहुना जलपंक्षी ओ रैथाने जलपंक्षीके स्थितिबारे जानकारी पैना उद्देश्यसे जलपंक्षीके गणना कार्य करल हो । सुरुवातमे कैलालीके घोडाघोडी ओ शुक्लाफाँटा राष्ट्रिय निकुञ्जमे गणना कार्य करल बा ।

शुक्लाफाँटा राष्ट्रिय निकुञ्जमे पुस १८ ओ विश्वरामसार क्षेत्रमे सूचिकृत घोडाघोडी ताल क्षेत्रमे पुस १९ गतेसे जलपंक्षीके गणना कार्य हुइटी रहल हो । डुनु जिल्लामे छुट्टाछुट्टे टोली बनाके जलपंक्षीके गणना कार्य हुइटी रहल चिरैँविद् हिरुलाल डंगौरा जानकारी डेलै ।

३४३ प्रजातिके चिरैँ पाजैना घोडाघोडी ताल क्षेत्रमे गणनाके कार्य ओराइल बा । यी टल्वा क्षेत्रमे हिउँदमे हालसम ६४ प्रजातिके जलपंक्षी अभिलेख करल बा । पाछेक गणनामे रैथाने जलपंक्षीके संख्या ठीकठीके अभिलेख रलेसे फेन बसाइँ सरके अउइया पाहुना जलपंक्षीके संख्या कम फेला परल जनाइल बा ।

‘नकरोड ताल क्षेत्रमे जलपंक्षीके संख्या मजा डेखगैल । मने, मुख्य घोडाघोडी टल्वामे भर बसाइँ सरके आइल जलपंक्षी कम मात्रामे डेखगैलै,’ चराविद् डंगौरा कहलै, ‘घोडाघोडीमे पाहुना जलपंक्षीके अवस्था सन्तोषजनक नाइ डेखगैल ।’

कैलालीके बरवार सिमसार मानजैना घोडाघोडी टल्वा क्षेत्रमे चीन, साइबेरिया, मंगोलियासे पाहुना जलपंक्षी जार छलक लाग हिउँदमे अइना करठै । इ टल्वा क्षेत्रमे तीनठो टोली बनाके जलपंक्षीके गणना कैना कार्य हुइल बा । बसन्ता वन क्षेत्रमे रहल सिमसारमे फेन जलपंक्षीके गणना कार्य हुइना जनाइल बा ।

ओस्टके, संरक्षित क्षेत्र शुक्लाफाँटा राष्ट्रिय निकुञ्जमे छुट्टे टोली जलपंक्षीके गणना करटी रहल बा । उ निकुञ्जमे हालसम ४५० चिरैँ प्रजाति अभिलेख करल बा । पक्षी संरक्षण संघ (बीसीएन) के अगुवाइमे निकुञ्जभिट्टर जलपंक्षीके गणना हुइटी रहल शुक्लाफाँटा राष्ट्रिय निकुञ्जके सहायक संरक्षण अधिकृत रविन चौधरी जानकारी डेलै । ‘गणना कार्य जारी बा,’ उहाँ कहलै ।

शुक्लाफाँटा भिट्टर शिकारी ताल, कालीकिच, रानी, ताराताल, सोलगौरी लगायतके प्राकृतिक टल्वामे हिउँदमे अइना पाहुना चिरैँ सहित रैथाने जलपंक्षी पैना करल बाटै ।

ओस्टके, निकुञ्जसे बनाइल कृत्रिम पोखरीमे फेन जलपंक्षी पैना करल बाटै । निकुञ्जभिट्टर रहिके चौधर लडियामे समेत जलपंक्षीके गणना हुइना सहायक संरक्षण अधिकृत चौधरी जानकारी डेलै ।

शुक्लाफाँटामे हालसम छोट ओ निकुज्ञ किनारके टल्वामे गणना कार्य हुइटी रहल जनाइल बा । निकुञ्जभिट्टर रहल बरवार सिमसार क्षेत्रमे गणनाके कार्य आभिन बाँकी रहल बीसीएनके फिल्ड अधिकृतसमेत रहल चिरैँविद् डंगौरा बटैलै । जार याममे जलपंक्षीके गणना कार्य माघ ५ गतेसम हुइना जनाइल बा ।