सुुरक्षाके सक्कु अंग ‘हाई अलर्ट’
पहुरा समाचारदाता
धनगढी, २४ पुस । प्रधानमन्त्री केपी शर्मा ओली आज धनगढीमे हुइना जनसभाहे सम्बोधन करे अइना हुइल पाछे धनगढीके सुरक्षा व्यवस्थामे कडाइ करल बा ।
प्रधानमन्त्री केपी शर्मा ओली प्रतिनिधि सभा भंग करलपाछे उत्पन्न राजनीतिक संकटपाछे ओहकान अपने समूहसे आयोजना करे लागल जनसभाहे सम्बोधन करे उहाँ धनगढी आइ लागल हुइट । ओहेमारे धनगढीके सुरक्षा व्यवस्थामे कडाइ पारल बा । हुइ सेक्ना सम्भावित जोखिम तथा त्रुटिहे मध्यनजर करटी स्थानीय प्रशासनसे धनगढीके सुरक्षा व्यवस्थामे कडाइ पारल हो ।
प्रधानमन्त्री अइना कार्यक्रमहे लक्षित करटी कैलालीके प्रमुख जिल्ला अधिकारी यज्ञराज बोहराके संयोजकत्वमे बिफेक रोज जिल्ला सुरक्षा समितिके बैठक फेन बोलाइल रहे । सुरक्षा समितिसे सुरक्षाके जनपथ, सशस्त्र, नेपाली सेना, राष्ट्रिय अनुसन्धान कैके सक्कु सुरक्षा अंगहे हाई अलर्टमे राखल प्रमुख जिल्ला अधिकारी बोहरा बटैलै ।
हुइ सेक्ना सम्भावित त्रृटिहे लक्षित कैके प्रयाप्त सुरक्षा व्यवस्था मिलाइल प्रजिअ बोहरा जनैलै । जनसभा स्थल ओ प्रधानमन्त्री आवातजावत हुइना सडकमे करिया झण्डा, करिया ब्यानर ओ करिया मास्क प्रतिबन्ध लगाइल जनाइल बा ।
