सुदूरपश्चिम प्रदेशहे पाछे पर्ना तागत केक्रोठन नैहो : प्रधानमन्त्री ओली
पहुरा समाचारदाता
धनगढी, २४ पुस । नेकपाके अध्यक्ष तथा प्रधानमन्त्री केपी शर्मा ओली सुदूरपश्चिम प्रदेशहे पाछे पर्ना तागत केक्रोठन नैरहल बटैले बाटै ।
नेकपासे शुकके धनगढीमे आयोजित जनसभाहे सम्बोधन करटी प्रधानमन्त्री ओली विगतके दिनमे टमान कारणसे पाछे परलेसे फेन इ प्रदेशहे आब पाछे पर्ना केक्रोठन तागत नैरहल बटाइल हुइट ।
‘इ प्रदेश प्राकृतिक श्रोतसे भरिपूर्ण बा, सेती, कर्णाली लडिया यहै बहल बा । प्रदेश टमान खानीके श्रोतसे भरि भराउ बा । अत्रा उिढर अवसर रलेसे फेन यहाँके जनता भारतमे जाके आपन श्रम बेच्टी रहल बाटै’, प्रधानमन्त्री कहलै–‘आब विकास निर्माण लगायतके सक्कु काम इहे प्रदेशसे सुरु करब । रोजगारी यहै सृजना करब ओ प्रदेशहे समृद्ध बनाम ।’
प्रधानमन्त्री आघे कहलै–‘प्रदेशमे गरिबी, अशिक्षा, पछौटेपन समस्याके समस्या रहल बा । इ सब मै सक्कु बुझ्ले बाटुँ । यहाँके सुकुम्बासी, भूमिहीन दशकौंसे बैठ्टी आइल आपन जग्गाके लाल पुर्जा नाइ पैले हुइट । इ सक्कु समस्याके हाली समाधान हुई ।’
ओस्टके प्रधानमन्त्री ओली प्रदेशके समग्र विकासके लाग कञ्चनपुरमे बन्टी रहल सुख्खा बन्दरगाह, गौरी फन्टा नाकाके स्तरोन्नति ओ धनगढी विमानस्थलहे रातके फेन उडान भरे सेक्ना मेरके अन्तराष्ट्रिय विमानस्थलके रुपमे स्तरोन्नति फेन कैना बटैलै । उहीसे प्रदेशके असाधाराण विकास हुइनामे प्रधानमन्त्री विश्वास व्यक्त रलै ।
ओस्टके लम्मा समयसे चर्चाके विषयमे रहल पश्चिम सेती परियोजनाहे अपने लगानीमे आघे बहै्रना, सेती लोकमार्ग स्तरोन्नति, चैनपुरसे टकलाकोटसमके उरै नाकाके काम समेत हाली आघे बहै्रना बटाइल रहिट ।
कलेसे परम्परागत कृषि प्रणालीहे आधुनिकीकरण ओ व्यवसायीकरण कैटी नेपालमे रोजगारीके अवसर सृजना कैनामे जोड डेलै ।
