मिस्टर एण्ड मिस थारुके आवेदन खुल्ला
पहुरा समाचारदाता
धनगढी, २४ पुस । तिसरा संस्करणके मिस्टर एण्ड मिस थारु २०२१ के लाग आवेदन खुल्ला करल बा ।
वाइएसी इभेन्ट्सके सहकार्यमे जह इन्टरटेनमेन्टके आयोजनामे हुइ लागल मिस्टर एण्ड मिस थारुके आवेदन खुल्ला करलसंगे अडिसनके मिति समेत तय करल बा ।
आयोजकके अनुसार माघ २४ गते चितवनसंगे विराटनगर ओ नेपालगञ्जमे एकसाथ अडिसन हुइटी बा । ओस्टके माघ २८ गते झुम्का, लहान, वीरगञ्ज ओ धनगढीमे एकसाथ अडिसन हुइटी बा । ओस्टके फागुन १ गते काठमाडौं, बुटवल ओ दाङमे अडिसनके मिति तय करल जह इन्टरटेनमेन्टके प्रमुख कार्यकारी अधिकृत (सिइओ) सुरेश चौधरी जानकारी डेलै । कोभिड–१९ के कारण ढिला कैके प्रतियोगिता आयोजना करे लागल चौधरी बटैलै ।
अडिसन सहजताके लाग आयोजकसे हरेक अडिसन क्षेत्रके लाग छुट्टाछुट्टे आधिकारिक प्रतिनिधि तोक्ले बा । विराटनगर अडिसनके लाग सिजन चौधरी ओ आकृति चौधरीहे प्रतिनिधिके रुपमे तोकल बा ।
ओस्टके सुनसरीके झुम्का अडिसनके लाग रजनिस चौधरी, सिराहाके लहान अडिसनके लाग नितेश चौधरी, चितवनके लाग सृष्टि चौधरी ओ आशा चौधरी, बुटवल अडिसनके लाग रविन चौधरी ओ विज्ञान चौधरीहे प्रतिनिधिके रुपमे तोकल बा ।
ओस्टके दाङ अडिसनके लाग रेविका चौधरी, नेपालगञ्ज अडिसनके लाग माया चौधरी, वीरगञ्ज अडिसनके लाग राजीव चौधरी, धनगढी अडिसनके लाग डेविड चौधरी ओ पार्वती चौधरीहे प्रतिनिधिके रुपमे तोकल बा ।
अडिसनसे छनौट हुइलहुक्रनहे फागुन ८ गते अभिमुखीकरणमे सहभागि कराजैना बा । ओस्टके फागुन ९ गतेसे चैत्र ४ गतेसम छनौट हुइल सहभागिहुक्रनहे प्रशिक्षण कराजैना बा । लगातार दुई संस्करणके ग्राण्ड फिनाले काठमाडौंमे हुइलेसे फेन यी बेर चितवनमे हुइना हुइल बा । चैत्र ७ गते प्रतियोगिताके ग्राण्ड फिनाले करजैना वाइएसी इभेन्ट्सके इभेन्ट म्यानेजर जयस चौधरी जानकारी डेलै । उहाँ यी बेर ग्राण्ड फिनाले आउर भव्य बनैना प्रयासरत रहल बटैलै ।
सन् २०१७ से यी प्रतियोगिताके सुरुवात हुइल रहे । पहिलो संस्करणके मिस्टर थारु २०१७ चन्दन चौधरी रहल रहिट कलेसे मिस थारु २०१७ जेनिशा चौधरी हुइल रही । ओस्टके २०१८ के मिस्टर थारु रविन चौधरी ओ मिस थारु आकृति चौधरी हुइल रही ।
