‘हम्रहीन रेल ओ पानी जहाज नै चाहल हो, विकास चाहल बा’
पहुरा समाचारदाता
धनगढी, २५ पुस । संसद विघटन विरुद्ध नेपाली कांग्रेस क्षेत्र नम्बर ५ कैलालीसे शनिच्चरके रोज धनगढीमे विरोध सभा करले बा । संसद विघटन सर्वसत्तावाद, अधिनायक वाद, एकाधिकार, भ्रष्टाचार ओ अनियमितता विरुद्ध सहित विरोधमे उत्रल विरोध र्याली पार्कमोडसे धनगढीके रातोपुलमे विरोध सभा हुइल रहे ।
विरोध सभाहे सम्बोधन करटी उपमहानगरपालिकाके मेयर नृपबहादुर वड वर्तमान सरकार ओ नेकपा नेपालके संविधानउपर मनलग्टीक करल आरोप लगैले बाटै । उहाँ नेपाली जनताके बलिदानीसे प्राप्त संविधानउपर मनमानी करल आरोप लगाइल हुइट । उहाँ कहलै,‘इ कम्युनिष्टसे संविधानउपर मनलग्टीक करले बाटै । व्यक्तिगत स्वार्थ पूर्ति करे नाइ पाके संसद विघटन करैले बाटै । आब काँग्रेससे संविधानके रक्षाके लाग सडकमे आइल हो ।’
ओस्टके उहाँ शुकके धनगढीमे नेकपासे आयोजित जनसभामे प्रधानमन्त्री केपी शर्मा ओलीसे सुदूरपश्चिमके विकासबारे गफ किल डेके गैल टिप्पणी करले बाटै । ‘ प्रधामन्त्री जी भाषण कैकै गैल बाटै । गौरीफन्टा स्तरोन्नतीबारे बोलके गैलै । मने काहे आभिनसम निकास नैपैले हो । मेडिकल कलेज, छ लेन सडक निर्माण मै निर्माण कर्नु कहिके गफ डेले बाटै । मै अब्बेक सरकारहे अनुरोध करटुँ, हावा गफ नडेउ । हम्रहीनहे रेल ओ पानी जहाज चाहल नैहो, विकास चाहल बा ।’
ओस्टके, मेयर वडसे काँग्रेससे वडा सदस्य समेत बनैना योग्य नैठन्ना व्यक्तिहे नेकपा ओली समूहसे केन्द्रीय सदस्य बनाइल कहटी टिप्पणी फेन करले बाटै ।
