विद्यालयके ४ कोठे भवन सिलान्यास
पहुरा समाचारदाता
चौमाला, २५ पुस । कैलालीके गौरीगंगा नगरपालिका ५ अन्डैयास्थित महोन्याल माध्यामिक विद्यालयके ४ कोठे पक्की भवनके सिलान्यास हुइल बा ।
सुदूरपश्चिम प्रदेशके पुर्व सामाजिक बिकास मन्त्री दीर्घ सोडारी शुकके रोज एक कार्यक्रमके बीच सिलान्यास करल हुइट ।
सांसद सोडारीके पहलमे सामाजिक बिकास मन्त्रालयके ३८ लाखके लगानीमे उ भवनके निर्माण हुइना हुइल बा । ५ नम्बरके वडा अध्यक्ष जंग बिकके अध्यक्षतामे हुइल कार्यक्रममे जिल्ला समन्वय समिति कैलाली उपप्रमुख सुन्दरीदेवी चौधरी लगायतके मन्तव्य डेहल रहिट ।
ओस्टके पुर्वमन्त्री सोडारी ओहे वडाके जनजागृती आधारभुत विद्यालयके ४ कोठे पक्की भवनके सिलान्यास करले बाटै ।
विद्यालय व्यवस्थापन समितिके ज्येष्ठ सदस्य जितमान विश्वकर्माके अध्यक्षतामे हुइल कार्यक्रममे जिल्ला जसपाके नेता करन साउद, प्रकाश नेपाली, नेकपा कैलाली जिल्ला सदस्य भक्त बिक, वडाअध्यक्ष जंग बिक लगायतके मन्तब्य डेहल रहिट ।
