माघ १ गते सार्वजनिक बिदा, थारु समुदायसे ३ दिन बिदा माग
पहुरा समाचारदाता
धनगढी, २६ पुस । सरकारसे माघ १ गते सार्वजनिक बिदा डेना निर्णय करले बा । अँट्वारके बैठल मन्त्रिपरिषद् बैठकसे माघके अवसरमे बिदा डेना निर्णय करल हो ।
माघ १ गते माघे संक्रान्ति पर्ना हुइल ओरसे सरकारसे हरेक बरस माघ १ गते सार्वजनिक विदा डेना करठ् । मने, उहे थारु समुदायके लावा बरस एर्व बर्का टिह्वार फेन बनाए हुइल ओरसे माघमे कम्तीमे ३ दिन सार्वजनिक विदा माग करले बाटै ।
थरुहट थारुवान राष्ट्रिय मोर्चाके कैलाली जिल्ला संयोजक तथा थाकस कैलाली उपसभापति माधव चौधरी माघमे कम्तीमे ३ दिन सार्वजनिक विदाके माग करलै । माघ थारु समुदायके लावा बरस एवं बर्का टिहार रहल ओरसे उहाँ पुस महिनाके अन्तिम दिन, माघ १ ओ २ गते सार्वजनिक विदा डेहे पनाए माग करलै ।
सुदूरपश्चिम प्रदेश सरकारसे थारु समुदायके मुख्य टिहवार माघ ओ अट्वारीमे एकएक दिन सार्वजनिक विदा डेना करल बा । थारु कल्याणकारिणीसभा सहित थारु अन्य संघ संस्थासे थारुनके मुख्य टिह्वारमे सरकारसे सार्वजनिक विदा डेहे पर्ना माग लम्मा समयसे करटी आइल बाटै ।
यिहीसे आघे थारु समुदाय सुदूरपश्चिम प्रदेशमे अटवारीमे सार्वजनिक बिदा नाइ पैले रहिट । यद्यपि थारु समुदायसे केन्द्रीय स्तरसे अटवारी ओ माघमे बिदाके माग करटी आइल बाटै ।
