सामुदायिक विद्यालय समितिसे संगठन विस्तार
पहुरा समाचारदाता
सुखड, २६ पुस । विद्यालयके क्षेत्र ओ सुधार योजनामे काम कैना सामुदायिक विद्यालय समिति महासंघ नेपाल आपन संगठन विस्तार करले बा ।
२०७० सालमे स्थापना होके केन्द्र ओ प्रदेश समितिके टुंगो समेत लगा सेकल महासंघसे जिल्ला तथा पालिका स्तरमे संगठन बिस्तारके कामहे तीव्र पारल हो । सुदूरपश्चिमके टमान जिल्लामे संगठन बिस्तार करटी रहल महासंघसे कैलालीमे फेन समिति गठन करले बा ।
अँट्वारके कैलालीके सुखडमे आयोजना करल जिल्ला स्तरीय भेलासे खकेन्द्र ठकुल्लाके अध्यक्षतामे १५ सदस्यीय समिति चयन करल हो । समितिसे जिल्ला भरके सामुदायिक विद्यालय व्यवस्थापन समितिके अनुगमन तथा परिचालन कैना बा । साथे स्थानीय पालिकामे फेन संगठन बिस्तार करटी जैना समेत बटाइल बा ।
सामुदायिक विद्यालय समिति महासंघ नेपालके सुदूरपश्चिम प्रदेश अध्यक्ष प्रेम राज भाटके अध्यक्षतामे हुइल भेलाके बर्का पहुना जिल्ला समन्वय समिति कैलालीके सभापति सूर्य थापा रहल रहिट । ओस्टके कार्यक्रममे सामुदायिक विद्यालय समिति महासंघ नेपालके केन्द्रीय उपाध्यक्ष हर्क धानुक, शिक्षा विकास तथा समन्वय इकाई कैलालीके प्रमुख वैकुण्ठ सुबेदी, घोडाघोडी नगरपालिकाके प्रमुख ममताप्रसाद चौधरी लगायत रहल रहिट ।
सामुदायिक विद्यालय समिति महासंघ नेपालके सुदूरपश्चिम प्रदेश उपाध्यक्ष धु्रव राज उपाध्याय स्वागत मनतब्य राखल रहिट कलेसे कार्यक्रमके सञ्चालन महासंघके सचिव नेत्र भण्डारी करल रहिट ।
