थारु गाउँमे माघी डेवानी सुरु
सरोज बन्लै २६ औं बार भल्मन्सा, तीन पुस्तासे विना पारिश्रमिक सेवा
पहुरा समाचारदाता
धनगढी, ४ माघ । कैलालीके धनगढी उप–महानगरपालिका वडा नम्बर ८ धनगढी गाँउक सरोज चौधरी अशौक सालफे भल्मन्सामे चयन हुइल बाटै । उहाँक यी बरस भल्मन्सा बन्ना २६ औं बार हो ।
धनगढी गाउँक पुरान थारु बस्ती समाज माघी डेवानीमार्फत हुकहिनहे अशौफे फुलमाला घलाके अगुवा चुन्लै । गाउँ समाजसे गाउँ प्रमुखके जिम्मेवारी पाइलपाछे गाउँके विकास निर्माण, आपसी मेलमिलाप तथा झै–झगडा मिलैना ओ और सरोकारवाला निकायहुकनसंग मजा समन्वय करल कहटी हुकहिनहे फेरसे भल्मन्साके जिम्मेवारी डेहल धनगढी गाउँ पुरान थारु बस्तीके सुर्य चौधरी बटैलै ।
सरोज चौधरी २०५२ सालसे लगटार भल्मन्सा खेलैटी आइल बटै । ‘गाउँ समाजमे निस्वार्थ भावनाके साथ सेवा डेटी आइल बटु,’ नवनिर्मित भल्मन्सा सरोज कहठै–‘भल्मन्सा बन्के २५ बरससे विन पारिश्रमिक सेवा डेगैल, अशौफे गाउँ समाज अगुवाके रुपमे चुन्लै ।’ उहाँ कहलै, मै टे २०५२ सालसे भल्मन्सा खेलाइटु मोर बाबा ओ बुदुक नइविटटसम भल्मन्सा खेलैनै ।
सरोजके बाबा रामचन्द्र चौधरीफे निस्वार्थ, पारिश्रमिक विना अपन जीवनभर भल्मन्सा खेलाइल रहिट । उहाँ २०५२ सालमे विटलपाछे हुकन छावा सरोज चौधरी भल्मन्सा खेलैना पाला लेहल रहिट । ओस्टेक रामचन्द चौधरीके बाबा मन्थु चौधरीफे अपन जीवनभर भल्मन्साके भूमिका निभैटी गाउँक सेवा कैना लगाइल रहिट । गाउँक सेवामे लागल मन्थुसेलेके सरोज चौधरीसम हेरेबेर तीन पुस्ते पुगठ ।
ओस्टेक चौकीदारमे जगपती चौधरी फेरसे सर्वसहमतिसे चयन हुइल बाटै । गाउँक भल्मन्सा सरोज कहठै, भुरा खेलसे शिक्षामे विशेष जोड डेना कहिगिल बा । धनगढी गाउँक पुरान थारु बस्ती समाज ३८ घरधुरी बा । कलेसे रानाथारुके अलग भन्मन्सा बाटै ।
बड्घर/भल्मन्साके काम घरझगडा, सम्पति, अंशवण्डा सम्बन्धी विवादलगायत देवानी मुद्धाके छिनोफानो कैना, कृषि पेशामे आश्रित थारू समुदायमे पत्येक वर्ष गाउँके सिचाई कुलुवा बनैना तथा मर्मत सम्भार कैना, गाउँघरके सडक बनैना, भोज तथा मृत्यु संस्कारलगायत कार्यमे गाउँवासीहुकनहे परिचालन कैना रहठ । निर्वाचित भल्मन्सा सरोज चौधरी थारु समुदायके बडघर प्रथाहे सरकारसे कानूनी मान्यन्ता डेहे पर्ना माग करले बटै ।
भोला बन्लै १४ औं चो भल्मन्सा
कैलालीके कैलारी गाउँपालिका वडा नम्बर ३ मुडा गाउके भल्मन्समे भोला चौधरीके भल्मन्समे १४ औँ चो चयन हुइल बटै ।
बड्कामुडा गाउके भुरा खेलमे भल्मन्सा भोला चौधरीके अगवाइमे हुईल भुरा खेलमे समाजके सर्वसहमतीसे यी बरष भल्मन्सा चौधरीके १३ बरष भल्मन्सा खेलाइल ओरसे गाउसमाज रूचाइ ओरसे फेनसे भल्मनसा पदमे चुनल हुईट ।
भुरा खेलसे गाउँमे हुईल परपुजामे लाग उठाईल रकम ओ बरस भरमे हुईल खर्च गाउँके सचिव भागिराम चौधरी उठाईल रकम ३६ हजार चार सय ७० रहे कलेसे खर्च हुईल ४३ हजार तीन सय ८८ रहे ओ ६ हजार नौ सय १८ रूपिया ऋणमे रहल सुनैनै ।
बरकामुडा गाउमे १ सय ३० घरधुरी रहल गाउँ रहल बा । यीहिसे पहिले यी गाउमे भल्मन्साके कुछफे ज्याला नै रहे समाजसेवाके रूपमे किल काम कर्ती रहल रहित यी बरषसे भल्मन्सा ओ सचिवहे घरौरा दस किलो धान देना निर्णय समाज निर्णय करले बा । अभिन भल्मन्सा किल चयन हुईल बटै कुछदिन पछे सचिव चुन्ना रहल बा ।
