मानव बेचबिखनके घटना वृद्धि
पहुरा समाचारदाता
कैलाली, ४ माघ । सुदूरपश्चिम प्रदेशमे मानव बेचबिखनके घटना बर्हटी गैल बा । सुदूरपश्चिम प्रदेश प्रहरी कार्यालयके तथ्यांक अनुसार मानव बेचविखनके घटना नैरुकके बर्हटी गैल डेखाइल बा ।
मानब बेचबिखन प्रभावितहुक्रनके प्रदेश स्तरीय अधिकारमूखी पद्धतिके अवधारण स्पष्टता विषयक अभिभुखिकरण कार्याक्रममे सुदूरपश्चिम प्रदेश प्रहरी कार्यालयके जगदिश सिंह मानब बेचबिखनके घटना बर्हटी रहल बटैलै ।
उहाँ प्रहरी कार्यालयसे गाउँ टोल ओ विद्यालयमे पुगके टमान खाले जनचेतनामूलक कार्यक्रम सञ्चालन करटी अइलेसे फेन मानब बेचबिखनके घटनामे न्यूनीकरण नैहुइल बटैलै । प्रदेश प्रहरी कार्यालयके तथ्यांक अनुसार ०७४/०७५ मे ३१ ठो, ०७५/०७६ मे ३६ ठो ओ ०७६/०७७ मे १८ मुद्धा दर्ता हुइल बा । जब की ०७७ कार्तिकसम कोभिड महामारीके कारण भारतीय सीमानाका पुरे बन्द रहे । मने पुस मसान्तसम १८ ठो मुद्धा दर्ता हुइना कहलक घटनामे वृद्धि हुइल डेखाइठ्, सिंह कहलै ।
गाउँघरमे हिंसा, कुरिति तथा लागुऔषधके बारेम जनचेतना मूलक कार्यक्रमसे न्यूनीकरण हुइना हुइल ओरसे राज्य तथा संघसंस्थासे सहकार्य कैके हातेमालो कैना जरुरी रहल प्रदेश प्रहरी सिंहके कहाइ रहे ।
ओस्टके कार्यक्रममे सुदूरपश्चिम प्रदेशके उपसभामुख निर्मला बडाल जोशी सुदूरपश्चिम प्रदेश सरकारसे अन्धव्श्विास तथा समाजमे रहल कुरीतिके चिरफार कैना लक्षित समुदायमे टमान कार्यक्रम सञ्चालन करल जानकारी डेली ।
उहाँ सुदूरपश्चिम प्रदेश सरकारके सीमानाका होके मानब बेचविखन तथा ओसारपोसार हुइटी रहलुहुक्रनके उद्धार कैके ओइनके सुरक्षा तथा पुनस्थापना कैना राज्यके दायित्व रहल बटैटी प्रदेश सरकारसे अपने सुरक्षित अवासगृह सञ्चालन कैना तयारीमे जुटल बटैली ।
संविधानसे महिला तथा लैंगिकताके सवालमे सक्कु जनहनहे समान तरिकासे सम्बोधन करलेसे फेन व्यवहारिक कार्यान्वयनसम आइटसम कहि न कहि महिला, बालबालिका, तथा अन्य शारिरीक मानसिक तथा आर्थिकरुपसे कमजोर रहल व्यक्तिउपर विभेद हुइटी रहल उपसभामुख बडाल कहली ।
उहाँ सरकारसे करे नैसेकल काम गैरसरकारी संघसंस्थासे करटी रहल ओरसे हिंसा प्रभावितहुक्रनके आत्मबल बह्राइक लाग महत्वपूर्ण योगदान रहल बटैली ।
ओस्टके राष्ट्रिय मानव अधिकार आयोग सुदूरपश्चिम प्रदेशके संयोजक मोहन जोशी पाछेक अवस्थामे श्रममे इच्छा विपरित कार्यमे बाध्यकारी कैना क्रम बर्हटी रहल बटैटी जबरजस्ती, टमान प्रलोभनमे पारके कौनो फेन कार्यमे सहभागी करैना फेन मानब बेचबिखनके परिभाषासे सम्बोधन हुइना बटैलै ।
ओस्टके जिल्ला प्रहरी कार्यालय कैलालीके महिला सेलका इन्चार्ज तथा प्रहरी नायक उपरिक्षक खेमराज पन्त सीमानाकासे दिनदिने जोखिममे परल महिला तथा बालबालिकाहुक्रनहे उद्धार करटी रहल बटैलै । ओहकान अनुसार उद्धार हुइल व्यक्तिहे सुरक्षित स्थानमे रख्ना सरकार एकदमे निरह बनल बटैलै ।
प्रहरी नायक उपरिक्षक पन्त महिला सेल कार्यालय कैलाली टमान संघसंस्थासे समन्वय ओ सहकार्य कैके काम करटी रहल बटैटी सरकारसे अपने छुट्टे सुरक्षित अवस गृह सञ्चालन कैलेसे काम कैना सजिल हुइना बटैलै ।
कार्यक्रममे शक्ति नेपालके अध्यक्ष चिरमाया तमाङ आपन विगतके ईतिहासहे खोट्लटी अब्बे फेन देशभरमे २९ हजार मनै टमान नाउँसे बेचबिखनसे प्रताडित रहल बटैली ।
उहाँ बेचबिखनमे परलहे समाजसे हेर्ना दृष्टिकोण, उहाँहुक्रनके सामाजिक पुर्नमिलन तथा सम्मानमे बदलाप लन्ना सक्कु जनहनके साथ ओ सहयोगके लाग सुदूरपश्चिममे नेटवर्कके जरुरी रहल बटैली ।
