टीकापुर अस्पतालहे शव बाहन
पहुरा समाचारदाता
धनगढी, ५ माघ । नागरिकस्तरसे संकलन करल सहयोगसे टीकापुर अस्पतालहे शव बाहन हस्तान्तरण करल बा । टीकापुर सरोकार समूह ओ ह्युम्यानिटी फाउण्डेशन नेपालसे अँट्वारके एक कार्यक्रमके बिच अस्पतालहे शव बाहन हस्तान्तरण करल हो ।
टीकापुर सरोकार समूहके संयोजक वरिष्ठ पत्रकार प्रशान्त अर्याल ओ फाउण्डेशनके दीर्घराज उपाध्याय, पुष्कर ओझा, मानसिंह साउँद शव बाहनके चाबी टीकापुर अस्पताल विकास समितिके अध्यक्ष दीपक रावलहे हस्तान्तरण करल रहिट ।
शव बाहनके चावी हस्तान्तरण करटी समूहके संयोजक अर्याल जन्मभूमिके लाग छोट सहयोग करे पाइलमे खुशी लागल बटैलै । उहाँ अइना दिनमे समेत टीकापुरके लाग टमान सामाजिक अभियान सञ्चालन कैना योजना रहल बटैलै ।
टीकापुर अस्पताल विकास समितिके अध्यक्ष दीपक रावल शव बाहन खरिदके लाग अभियान सुरु करलमे टीकापुर सरोकार समूह ओ ह्युम्यानिटी फाउण्डेशनप्रति आभार व्यक्त करलै । उहाँ मानवीय सेवामे डेखाइल सदासयतासे थप जिम्मेवार बनाइल बटैलै ।
उहाँ अस्पताल सक्कु जनहनके सामुहिक प्रयाससे सञ्चालन कैन आपन उद्देश्य रहल ओ यकर लाग हातेमालो कैना आग्रह करलै । उहाँ स्वास्थ्य संस्थामे राजनीतिक आग्रह पूर्वाग्रह नैराखके सक्कु जनहनके सहयोगके खाँचो रहल औंल्याइलै ।
