लावा भोजहीन्से खाद्यान्न सहयोग
पहुरा समाचारदाता
धनगढी, ५ माघ । भर्खरे भोज हुइल धनगढी–४ निवासी रुपेश खड्का ओ यमुना कठायतसे अनाथ आश्रम तथा सडकसे उद्धार करल बेसहरा महिलाहे डन्डुर लुगरा ओ खाद्यान्न सहयोग करले बाटै ।
बाबा टेलिभिजन तथा केवुलके सञ्चालक तथा कैलाली उद्योग वाणिज्य संघके सदस्य खड्का ओ ओहकान गोसिनीया आपन भोजहा अवसरमे उ सहयोग करल हुइट । गैल बिफेक रोज वैवाहिक बन्धनमे बाँधल खड्का दम्पति धनगढी–५ मे रहल आमाको माया छात्राबासमे रहल बालबालिकाहे १२ थान ब्यालेंकेट सहयोग करल हुइट ।
छात्रबासमे अब्बे २७ जाने बालक बैठ्टी आइल बाटै । आपन जीवनके महत्वपूर्ण समयमे उहाँहुक्रनहे खुशी बाँटके सहयोग कैना सोच बनाइल खड्का बटैलै ।
जार ओ शितलहरके समयमे ब्यालेंकेटसे राहत मिल्ना विशवास उहाँके रहल बा । ओस्टके धनगढी–७ मे रहल दृष्टि फाउण्डेशनहे ५ बोरा चाउर, १० केजी दाल, एक कार्टुन तेल ओ १२ केजी नोन सहयोग करले बााटै । फाउण्डेशनसे सडकमे अइना बाध्य रहल, मानसिक समस्यामे परल ओ असहाय महिलाहुक्रनके उद्धार, उपचार, परामर्श ओ स्याहार कैना करल बा ।
फाउण्डशनके सञ्चालक कल्पना भट्ट खाद्यन्न प्राप्त करलपाछे नवविवाहित दम्पतिहे बधाई तथा शुभकामना व्यक्त करल रही । फाउण्डेशनमे अब्बे ३९ जाने महिला रहल बाटै । इ संस्थामे भोज, जन्मोत्सव लगायतके अवसरमे दानदाताहुक्रे टमान सहयोग कैना करल बाटै ।
