बैसपुरके भल्मन्सामे फेनसे लल्टु
पहुरा समाचारदाता
हसुलिया, ५ माघ । कैलारी गाउँपालिका वडा नम्बर ५, बैसपुर गाउँक खोजनी बोजनी (भुरा खेल) अँट्वारके रोज निम्जल बा ।
भुरा खेलसे गाउँक पुराने भल्मन्सा लल्टुराम बौखहीके टीमहे फेनसे निरन्तरता डेगैल बा । उहाँके पुराने टीमके अघरियामे फेन रामप्रसाद चौधरी, कोषाध्यक्षमे शुक्रराज चौधरीहे निरन्तरता डेहल हो ।
उहे कार्यक्रममे आर्गिक बरस २०७६/०७७ के आम्दानी ३ लाख ६० हजार २०४ रुप्या ओ खर्च ओ २ लाख ६६ लाख ०८० रुप्या बराबर हिसाव सुनाइल रहे ।
कलेसे गाउँक समाजमे रहल साझा टेन्ट, भारा बर्टनसे १३ हजार ९३० रुप्या आम्दानी फेन हुइल जनाइल बा ।
भुराखेल शंकर प्रसाद चौधरीके घरगोसियाइहे हुइल रहे । कलेसे सञ्चालन बिराजु चौधरी करल रहिट ।
ओहे बिच बैसपुर गाउँके हरेक कामकाज, नीतिनियममे सहजताके लाग गाउँहे नाउँ सहित ७ टोलमे छुट्याइल बा । उ प्रत्येक टोलके लाग एक जाने अघरिया फेन चयन करल बा । जेम्ने विजय टोलके अघारीमे गोकर्ण चौधरी हिम्मतके सत्यविर चौधरी, त्रिवेणी के कालू चौधरी, एकताके राम कुमारी चौधरी, लाली गुराँसके काली चरण चौधरी, आक्रोशके छुनु राम चौधरी ओ डाइमण्डके सिरेन चौधरीहे अघरियाके रुपमे चयन करल बा ।
भल्मन्सा बौखाही गाउँ भरिक किसानन्ठन सपथ खैटी गाउँ समाजके लाग निस्वार्थ भावनासे गाउँके विकासमे लग्ना ओे बिना भेदभाबसे गाउँके हरेक कामकाजमे साथ डेना बटैलै । ओस्टके अघरिया ओ कोषाध्यक्ष फेन सपथ खैटी अइना दिनमे सक्कु जनहनके सरसल्लाह सुझावसे समाजके काम कैना प्रतिवद्धता जनाइल रहिट ।
उत्तरभर्रीके भलमन्सामे सन्तराम ओ लालपुरके भलमन्सामे बुधराम
माघ ओराइलसंगे थारु बस्तीमे माघीदेवानी, खोजनीबोजनी सुरु हुइल बा । यिहे बिच अँट्वारके रोज कैलारी गाउँपालिका वडा नं ३ उत्तर भर्रीके भुरा खेल हुइल बा ।
भुरा खेलसे सन्तराम चौधरीहे भलमन्साके लाग चयन करगिल बा । निवर्तमान भल्मन्सा छेटेलाल चौधरीके घरगोसियामे हुईल भुराखेलसे सर्वसहमतिसे उहाँहे चयन करगिल हो ।
ओस्टके अघरियामे राकेश चौधरी ओ सचिवमे जितेन्द्र चौधरी चयन हुईल बाटै । कलेसे गाउँक चौकीदार (चिराकी) मे हरीप्रसाद चौधरी चुनल बाटै । उहे भुरा खेलसे चौकीदरुवाहे घरौरा दश किलो धान डेना फेन निर्णय करल जनाइल बा । गाउँमे दुई सय ३७ घरधुरी रहल बाटै ।
उहे बिच गाउँक गुरुवा फेन चुनगिल बा । बर्का गुरुवामे छिकु चौधरी ओ केसौकामे कालिराम चौधरीहे चयन करल बा कलेसे कालिमाई मन्दिरके पुजारी (सुसारी) बिफुराम चौधरी चयन हुईल बाटै ।
ओस्टके कैलारी–३, लालपुरके भुराखेलसे भल्मन्सा जगदिश चौधरीके घरगोसियाइमे हुइल भुराखेलस बुधराम चौधरी भलमन्सा ओ अघरियामे मंगलराम चौधरी चयन हुइल बाटै । गाउ“मे ५१ घरधुरी रहल बाटै ।
उहाँहुक्रनहे घरौरा १०/१० किलो धान डेना फेन निर्णय करल जनाइल बा । कलेसे गाउँक गुरुवामे प्रदेशु चौधरी चयन हुइल बाटै । ओ उहाँहे घरौरा २० किलो धान डेना अमर युवा क्लबके अध्यक्ष मणिप्रसाद चौधरी जानकारी डेलै ।
