रानाथारु भाषा अभिलेखीकरणके लाग व्याकरण निर्माण कैटी
पहुरा समाचारदाता
कञ्चनपुर, ५ माघ । सुदूरपश्चिम प्रदेशके कञ्चनपुर ओ कैलाली जिल्लामे बसोवास करटी आइल रानाथारू समुदायसे बोल्ना मातृभाषाके व्याकरण निर्माण ओ अभिलेखीकरण कैना हुइल बा । नेपाल रानाथारू समाजके सहयोग ओ समन्वयमे भाषा आयोगसे रानाथारू भाषाके अभिलेखीकरण सम्बन्धी अध्ययन करल बा ।
शनिच्चरके कञ्चनपुरके देखतभूलीमे नेपाल रानाथारू समाज आयोजना ओ भाषा आयोगके संयोजनमे रानाथारू भाषाके अभिलेखीकरण सम्बन्धी गोष्ठीमे व्याकरण निर्माण सहितके महत्वपूर्ण विषयमे सरोकारवालासे छलफल करल बा ।
नेपाल रानाथारू समाजके केन्द्रीय अध्यक्ष कृपाराम राना वर्तमान सरकारसे रानाथारू समुदायहे अलग्गे सुचीकृत कैना ओ रानाथारू भाषाहे समेत थप कैनासे रानाथारू समुदायके पहिचान स्थापित हुइल बटैलै । राथारू भाषाके अभिलेखीकरण कैना कार्य व्याकरण बिना पूर्ण नाइ हुइना हुइल ओरसे यकर तयारीमे नेपाल रानाथारू समाज ओ भाषा आयोगके टोली केन्द्रित रहल उहाँ जानकारी डेलै ।
रानाथारू भाषाके अभिलेखीकरण सम्बन्धी गोष्ठीमे बोल्टी कृष्णपुर नगरपालिकाके नगर प्रमुख कर्णबहादुर हमाल कञ्चनपुर ओ कैलालीमे बसोवास करटी आइल रानाथारू समुदायके स्थानिय पाठयक्रम निर्माणके कार्य आघे बह्रैना बटैलै । उहाँ रानाथारू समुदायके भाषा लिपिवद्ध करक लाग निर्माण हुइ लागल व्याकरणके लाग आवश्यक सहयोग कैना तयार रहल बटैलै ।
कृष्णपुर नगरपालिकाके उपप्रमुख रमिता राना बडायक जनप्रतिनिधी नाइ रहल बेला रानाथारू समुदायके भाषाके अध्ययन करल उल्लेख करटी रानाथारू समुदायके भाषा अभिलेखीकरणके कार्यमे सहयोग कैना प्रतिवद्धता व्यक्त करलै ।
त्रिभुवन विश्वविद्यालय भाषा विज्ञानके सहायक डिन तथा भाषाशास्त्री डा. दुवीनन्द ढकालसे रानाथारू भाषाके पहिलचो अध्ययन हुइटी रहल ओरसे हाली व्याकरण सहित अभिलेखीकरण कैना बटैलै । रानाथारू समुदायके प्रत्यक्ष सहभागिता ओ अध्ययनसे शब्दकोष, व्याकरण तयार कैना ओहकान कहाइ बा ।
भाषा आयोगके उपसचिव गेहनाथ गौतमसे भाषासम्बन्धी संवैधानिक व्यवस्था अनुरुप कञ्चनपुर ओ कैलालीमे रहल रानाथारू समुदायके भाषा अध्ययन हुइटी रहल उल्लेख कैटी चालु आर्थिक बरसभित्रे भाषाबारे पहिल चरणके व्याकरण निर्माण कैना बटैलै ।
