कैलाली बहुमुखी क्याम्पस सुदूरपश्चिम विश्वविद्यालयके मातहतमे
पहुरा समाचारदाता
धनगढी, ५ माघ । कैलाली बहुमुखी क्याम्पस सुदूरपश्चिम विश्वविद्यालयके आंगिक क्याम्पसके रुपमे समायोजन हुइल बा ।
इहीसे आघे त्रिभुवन विश्वविद्यालयके आंगिक क्याम्पसके रुपमे रहल क्याम्पस लम्मा समयपाछे सुदूरपश्चिम विश्वविद्यालयके आंगिक क्याम्पसके रुपमे समायोजन हुइल हो । सुदूरपश्चिमाञ्चल विश्वविद्यालयके उपकुलपति डा. अम्मराज जोशी, राजिष्ट्रार डा. गोविन्दसिंह विष्ट ओ कैलाली बहुमुखी क्याम्पस सञ्चालन समितिके अध्यक्ष सूर्यबहादुर थापा, उपाध्यक्ष धनगढी उपमहानगरपालिका मेयर नृप वड, समायोजन कार्य दल संयोजक तथा पूर्व अध्यक्ष घनबहादुर शाह ओ क्याम्पस प्रमुख डा. पदमराज जोशी बीच सम्झौतापत्रमे हस्ताक्षर हुइल बा ।
२०७७ पुस ३ गते सुदूरपश्चिम विश्वविद्यालयके सम्पन्न आठौं साधारण सभासे स्वीकृत हुइल बमोजिम कैलाली बहुमुखी क्याम्पसहे सुदूरपश्चिमके आंगिक क्याम्पस बनैना निर्णय करल रहे । सुदूरपश्चिमाञ्चल विश्वविद्यालयके सभासे पहिलचो २०७० भदौँ ३० गते कैलाली बहुमुखी क्याम्पसहे आपन आंगिक क्याम्पस बनैना निर्णय करल रहे । मने कैलाली बहुमुखी क्याम्पससे सुरुसे समायोजनके लाग टमान माग राखल कारणसे समायोजन हुइ नैसेकल रहे ।
