पर्यटन प्रर्वद्धनके लाग खप्तड हेली टूर
पहुरा समाचारदाता
धनगढी, ५ माघ । आन्तरिक तथा बाह्य पर्यटन प्रर्वद्धन करक लाग माघ १४ गतेसे १८ गते ५ दिनके लाग पर्यटकहुक्रनके लाग खप्तड हेली टूर प्याकेज लानल बा ।
सुदूरपश्चिम प्रदेशके प्रमुख पर्यटकीय गन्तव्यके रूपमे रहल खप्तडमे पर्यटन प्रवद्र्धन करक लाग उ टूर प्याकेज लानल हो । उ प्याकेज सञ्चालन पाछे हेलिकप्टर मार्फत खप्तड अवलोकन करे सेकजैना बा ।
पैदल ओ सडक मार्ग हुइटी खप्तड जैना ढिउर समय लग्ना ओ हेलीकप्टर मार्फत कम सयम लग्ना हुइल ओरसे उ प्याकेज लानल हो । खप्तड होमस्टे झिग्राना डोटीसे हेलिकप्टर मार्फत खप्तड लैजैना
प्याकेज लानल हो ।
सोम्मारके धनगढीमे पत्रकार सम्मेलन मार्फत माघ १४ गतेसे १८ गतेसम हेलिकप्टर मार्फत खप्तड पुग्ना व्यवस्था करल जानकारी डेहल बा । पत्रकार सम्मेलनमे होमस्टेका प्रवन्ध निर्देशक दीपक कुमार खड्का हेलिकप्टर मार्फत खप्तड पुगक लाग टमान प्याकेज लानल बटैल । ५ दिनमे ३ सय पर्यटकहे खप्तड घुमैना योजना रहल उहाँ बटैलै । उहाँ खप्तड पुगलहुक्रनहे कम्तिमे आधा घण्टा हिउँमे रमुवाइना योजना रहल समेत जानकारी डेलै ।
जौन प्याकेज अन्र्तगत दिपायल–खप्तडसे खप्तड–दिपायलसम १० हजार, झिग्राना–खप्तडसे खप्तड झिग्रानासम ८ हजार भाडा दर निर्धारण करल बा । मने उ प्याकेजमे सञ्चारकर्मीके लाग छुट डेटी ७ हजार भाडादर निर्धारण करल बा ।
ओस्टके धनगढी–खप्तडसे खप्तड–धनगढीसम ३० हजार, धनगढी–दिपायल प्लेन, दिपायल खप्तड हेलिकप्टर डुनु ओर एक रात २ दिन खैना बैठ्ना सहित २१ हजार ५ सय, धनगढी–दिपायल स्थलमार्ग (बुकिङ गाडी), दिपायल–खप्तड हेलिकप्टर १५ हजार भाडा दर निर्धारण करल बा ।
