लक्ष्मणपुरके बरघरमे रतिराम ओ एकराज
भ्वाजम भोजरह्या ५१ जनसे ढिउर निजैना निर्णय
पहुरा समाचारदाता
बर्दिया, ६ माघ । बाँसगढी नगरपालिका अन्तर्गत लक्ष्मणपुर गाउँ क बार्षिक ग्रामसभा खोज्नी बोझ्नीसे गाँउ चलाइक लाग बरघरम रतिराम थारु ओ एकराज चौधरी चयन हुइल बाट ।
ओस्टक लिखन्डारम निर्मला थारु, अगहवाम छोटेलाल थारु, चौकीदारम रामप्यारे थारु, गुरुवा टेङगु थारु ओ केसौका गोपाल थारु, लोहारम पुर्ण बहादुर चुनारा सर्वसम्मत छानगैल बाट ।
बखेरीसे भ्वाजम भोजरह्या ५१ जनसे ढिउर निजैना, ४५ जनसे ढिउर चौठ्या नैजैना, बालबिबाह रोक्ना, जाँर मड पिख हल्ला बवाल करुइयन कारबाही कर्ना, गाउँ गल्ली सफा रख्ना लगायत निर्णय हुइल बा ।
ओस्टक बखेरीसे अइना बरस जासु हस्तकला केन्द्रम पुग्ना डगर बनैना, बिजली निपुगल घरक लाग पोल गर्ना, लक्ष्मणपुर सामुदायिक होमस्टे हन व्यवस्थित बनैना ओ गाउँक बिच्चम रहल शिवालयक जग्गा छुट्याख दर्ता कर्ना प्रकृयाम लैजैना निर्णय हुइल बा ।
