ढसल पुल मर्मत नइहुके दुर्घटनाके जोखिम

नरेन्द चौधरी
हसुलिया, ७ माघ । कैलाली जिल्लाके कैलारी गाउँपालिका वडा नम्बर ४ ओ ६ जोरना घुरहा पुल ढस्के दुर्घटनाके जोखिम बह्रल बा । बर्खाहा पानीसे पुलके आघेक भाग ढसल मने सरोकारवालाके ध्यान नइगैलपाछे दुर्घटनाके जोखिम बह्रल हो ।

कैलारी गाउँपालिका–६, भगतपुरके भल्मन्सा राजराम चौधरी उ पुल हुके लोड रहल लह्रिया वा चार चक्कक लोड गाडी ओसारपोसार गाह्रो रहल बटैलै । उहाँ कहलै– ‘स्थानीय सरकार गाउ“पालिकामे बारम्बार जाके मर्मात सम्भारके लाग बजेट छुट्यइक लाग कहल मने सुनुवाई नइहो ।’ कैलारी गाउँपालिका–६, धर्मापुरके भल्मन्सा चनकराम चौधरी पुलके मर्मत नइहुके रातके बेला पत्ता नइरहल व्यक्ति दुर्घटनाके परे सेक्ना बटैलै ।

पुलके पंखी भाग ढसल पा“च महिना पुग्लेसेफे मर्मतके लाग सरोकारवालाके ध्यान नइगैल कैलारी गाउँपालिका–४ के गाउँ खल्लाटोलके भल्मन्सा जगलाल डंगौरा बटैलै । उहाँ कहलै, हम्रे सरकारहे कर टिरठी मने सरकार जनताके समस्या काहे नइबुझठ, अभिनसम भारी दुर्घटना नइहुइल हो, दुर्घटना हुइलेसे जिम्मेवारी के हुई ।’

घुराहा पुलके मर्मतके लाग ढेर रकम लग्ना हुइल ओरसे गाउँपालिकामे मर्मतके लाग ओटरा बजेट रहल गाँउपालिका अध्यक्ष लाजुराम चौधरी बटैलै । उहाँ कहलै, मर्मत सम्भारके लाग प्रदेश सरकारहे अनुरोध कैगिल बा ।’ ओहोर प्रदेशसभा सदस्य बिरमान चौधरी संघीय सरकारके बजेटसे उ बनल ओरसे मर्मतके जिम्माफे संघीय सरकारसे लेहे पर्ना बटैठै ।

कैलारी गाउँपालिकाके के गाउँ ओ वडा नम्बर ६ भगतपुरके विचमे रहल कृषि सडकमे पर्ना घुराहा लडियामे रहल पुल निर्माण हुइल ५÷६ वर्ष हुइलेसेफे पुल निर्माण करल सूचना बोर्डफे नइहो । घुराहा पूल लिखल बोर्डमे पूलके लम्बाइ–एक सय २५ मिटर ओ स्पान संख्याः–५ लिखल सूचना बोर्ड रहल बा । पूल निर्माण करल समय, लागत ओ के बनाइल हो ओकर बोर्ड नइहो ।