‘राजनीतिक पूर्वाग्रहसे रेशम जेलमे’
पहुरा समाचारदाता
टीकापुर, ७ माघ । पूर्व प्रधानमन्त्री एवं समाजवादी पार्टी (जसपा)के संघीय परिषद् अध्यक्ष डा. बाबुराम भट्टराई सांसद रेशमलाल चौधरीहे सरकारसे राजनीतिक पूर्वाग्रहके आधारमे जेलमे राखल बटैले बाटै ।
बुधके कैलालीके टीकापुरमे जसपासे आयोजित सभाहे सम्बोधन करटी उहाँ कैलाली क्षेत्र नम्बर १ से विजयी सांसद चौधरीहे सरकारसे राजनीतिक पूर्वाग्रहके आधारमे जेलमे राखल अरोप लगैलै । टीकापुरमे २०७२ भदौ ७ गते हुइल घटना राजनीतिक रहल ओरसे उक्त घटनाहे राजनीतिक घटनाके रुपमे सम्बोधन करे पर्ना उहाँ औँल्याइलै ।
सम्बोधनके क्रममे उहाँ प्रधानमन्त्री केपी शर्मा ओली इतिहासके निरंकुश तानाशाह रहल आरोप फेन लगैलै । उहाँ पूर्वराजा बिरेन्द्र ओ ज्ञानेन्द्र समेत ओली जत्राके तानाशाह नैरहल बटैलै ।
‘पूर्वराजा वीरेन्द्र अो ज्ञानेन्द्र फेन अत्रा ढिउर तानाशाही नै रहिट । सेना, अदालतमे आपन मनै भर्ती कैना, राष्ट्रिय अनुसन्धान ओ राजश्व अनुसन्धान अपने मातहतमे लन्ना, संवैधानिक आयोगमे आपन मनै भर्ती कैनासे फेन उहाँ इतिहासके तानाशाही बन्ना संकेत हो,’ उहाँ कहलै ।
