पवेराके भल्मन्सामे फेरसे खुशीराम

थेवैके भल्मन्सामे जगदिश, पदाधिकारिन्के पारिश्रमिक तोकगिल

पहुरा समाचारदाता
हसुलिया, ७ माघ । कैलाली जिल्लाके कैलारी गाउँपालिका वडा नम्बर ५ पवेराके भल्मन्सामे फेरसे डुसरा बार खुशीराम चौधरी चयन हुइल बटै ।

बुधके रोज हुइल माघी डेवानीसे पुराने कार्यसमितिके कामके मुल्यांकन करके फेरसे उहीहे निरन्तरता डेना सहमति हुइल स्थानीय कमलेश कठरिया जनैलै । समितिके उपाध्यक्षमे प्रेमबहादुर चौधरी, सचिव विपराम चौधरी, ओ ओरगानमे रामनाथ कठरिया चयन हुइल बटै ।

भुरा खेलमे २ लाख ४८ हजार ६ सय ५९ रुप्या बचत रहल हिसाव सुनागिल बा । गाउँक निर्णयसे भल्मन्साहे रिचार्ज खर्चके लाग वार्षिक ४ हजार रुप्या, चौकीदारहे घरौरा ६ पसेरी धान, ओ गुरवाहे ३ पसेरी धान डेना सहमति हुइल बा । पवेरा गाउँमे २ सय २१ किसान रहल बटै ।

ओस्टके करके कैलाली जिल्लाके घोडाघोडी नगरपालिका–१०, थेवैमे लौवा भल्मन्सा छनौट कैगिल बा । बुधके रोज गाउँमे हुइल भुरा खेलसे जगदिश चौधरीहे भल्मन्सा छनौट कैगिल हो । चिराकीमे सोनुराम चौधरी चयन हुइल बटै ।

ओस्टेक टोलके भल्मन्सा सदस्यमे प्रकाश चौधरी, श्रीराम चौधरी, रामनाथ चौधरी, जालुराम चौधरी, सुनिल चौधरी, मायाराम चौधरी ओ दानसिहं चौैधरी रहल बटैलै । माघी डेवानीसे गाउँमे चिराकीहे घरौरा २५ किलो धान डेना निर्णय हुइल बा । गाउँक बचतमे ७ हजार २ सय ३० रहल बा । थेवै गाउँमे १२६ किसान रहल बटै ।