हमाल परिवारसे धनगढीमे निःशुल्क महाप्रस्थान यान सञ्चालन कैना
पहुरा समाचारदाता
धनगढी, ८ माघ । कैलाली लगायत सुदूरपश्चिम प्रदेशके टमान जिल्लामे शव बाहनके समस्या रहल बा । शव बाहन नैहोके स्वर्गबास हुइल व्यक्तिहुक्रनहे अन्त्येष्टिके लाग आर्यघाटनसम पुगैना समस्या हुइटी आइल बा ।
कुछ दिन आघेसम टीकापुर अस्पतालमे शव बाहन नैहोके टीकापुरके स्थानीयहुक्रे झेल्टी आइल समस्या नागरिकस्तरसे शव बाहन हस्तान्तरण करलपाछे उ समस्या कुछ हदसम दुर हुइना हुइल बा ।
इहे समस्याहे मध्यनजर करटी सामाजिक अभियन्ता तथा व्यवसायी गोपाल हमालसे धनगढीमे निःशुल्क महाप्रस्थान यान सञ्चालन कैना हुइल बाटै । बिफेक रोज पत्रकार सम्मेलनके आयोजना कैटी अभियन्ता हमाल निःशुल्क महाप्रस्थान यान सञ्चालन लाने लागल जानकारी डेलै ।
मृत्यु पाछे आर्यघाटसमके यात्रा सहज होए कना उद्देश्यसे यान सञ्चालनके तयारी करल हो । मृत्यु पाछे फेन मनै सम्मानसहित जैना व्यवस्था मिलाइक लाग निःशुल्क महाप्रस्थान यान सञ्चालनमे लन्ना तयारी हुइल अभियन्ता हमाल बटैलै । ओहकान अनुसार महाप्रस्थान यान सञ्चालनके लाग ३० लाख लगानी लाग्न जनाइल बा ।
निःशुल्क यान सञ्चालन करक लाग सम्पर्क व्यक्तिके रुपमे कैलाली उद्योग वाणिज्य संघके सचिव सिद्धराज पनेरुहे तोकल बा । कलेसे सञ्चालन खर्च हमाल परिवार नै ब्यहोर्न जनाइल बा ।
अभियन्ता हमाल कहलै–‘कुछ समयपाछे कौनो सघसंस्थासे निशुल्क रुपमे सञ्चालन कैना जिम्मा लेम कहलपाछे हम्रे हस्तान्तरण करब ।’ चालु आर्थिक बरसभित्रे निःशुल्क महाप्रस्थान यान सञ्चालनमे लन्ना उहाँ दाबी करलै ।
महाप्रस्थान यान सञ्चालनमे लन्ना तयारी हुइटी रहल बेला अभियन्ता हमालहे सामाजिक सञ्जालमे सफलताके शुभकामना सहित मजा कामके सुरुवात करलमे बधाई डेटी रहल बाटिन् ।
पत्रकार हिक्मत रावल आपन फेसबुक पेजमे शुभकामना डेटी लिख्ले बाटै–‘मन बरवार बनाइ परल, धन टे ढिउरसँग रहठ् । मुना जिना टे सांसारिक लिला हो, अन्तिम सत्य मृत्युु नै हो । मृत्युपाछे मसानघाटसमके यात्रा सहज बने, महाप्रस्थानके यात्रा किहुहे कठिन नहोए ।’
इहे भावनासे ओतप्रोत होके महाप्रस्थान सञ्चालनमे लन्टी रहल गोपाल हमाल ओ उहाँके परिवार जे समाज प्रति बिराट हृदय डेखैलै, मानवीयताके औरे उदाहरण पेश करलै समाजप्रतिके सद्भाव ओ पुनित कर्मके लाग साधुबाद !
