कम्युनिष्टके संरक्षणमे अपराध बह्रल
पहुरा समाचारदाता
धनगढी, ८ माघ । नेपाली कांग्रेस धनगढी उपमहानगरपालिका नगर समितिके सभापति एवम् धनगढी उपमहानगरपालिकाके प्रमुख नृपबहादुर वड कम्युनिष्टहुक्रे अपराधीनहे माला पहिराइल कारण मुलुकमे अपराध बह्रल अरोप लगैले बाटै ।
बिफेक रोज नेपाली कांग्रेससे वडा नम्बर ६ मे आयोजना करल वडा स्तरीय बिरोध सभाहे सम्बोधन कैटी उहाँ अइसीन आरोप लगाइल हुइट । ‘अपराधीहुक्रनके अभिभावक केपी ओली नेतृत्वके कम्युनिष्ट सरकार हो,’ नगरप्रमुख वड कहलै, ‘तीन बरसके अवधिमे कम्युनिष्टहुक्रे बलात्कारी, चोर, हत्यारा, भ्रष्टाचारीनहे संरक्षण कैना काम किल करलै ।’
उहाँ कम्युनिष्टहे दुई तिहाईके बहुमत डेके फेन सरकार चलाइ नैसेकल कहटी आघे कहलै– ‘सक्कु चीजसे असफल हुइलपाछे ओली संविधान बिपरित संसद बिघटन करल हुइट ।’ नगरप्रमुख वड संसद बिघटन कैना ओली नैतिक रुपमे प्रधानमन्त्रीके कुर्सीमे बैठे नैमिल्ना बटैलै ।
सर्वहाराके पार्टी कना कम्युनिष्ट कौन गरिबके जीवनस्तर उप्पर उठैले बा नगरप्रमुख वड कहलै, ‘कम्यूनिष्ट कहलक जनताके गरिबी, अभावमे राजनिति कैना पार्टी हो । नगरप्रमुख वड प्रचण्डसे १७ हजार गरिबके छावाछाइहे मारके १७ जाने आपन परिवारके सदस्य ओ नातेदारहे पद डेहल बटैलै ।’
नेपाली कांग्रेस धनगढी उपमहानगरपालिका वडा नम्बर ६ आन्दोलन परिचालन समितिके सदस्य प्रकाश शर्मा नेपाली कांग्रेसके नेतृत्वमे लानल संविधानके घाँटी निमोठल बटैलै । कार्यक्रम नेपाली कांग्रेस धनगढी उपमहानगरपालिका वडा नम्बर ६ वडा समितिके सभापती डण्डीराज सुवेदीके घरगोसियाइमे हुइल रहे ।
