घोडाघोडी लागु करल थारु भाषक पाठ्यक्रम

पहुरा समाचारदाता
सुखड, ९ माघ । कैलालीके घोडाघोडी नगरपालिकासे स्थानीय पाठ्यक्रम निर्माण करके लागू करले बा । थारु ओ नेपाली करके दुई भाषामे स्थानीय पाठ्यक्रम निर्माण करके लागल करल हो । यिहे शैक्षिक सत्रसे नगरपालिकासे कक्षा १ से ३ सम स्थानीय भाषाके पाठ्यक्रम निर्माण करके लागु करल बटाइल बा ।

राष्ट्रिय पाठ्यक्रम प्रारूप २०७६ मे हुइल व्यवस्थाअन्सार नगरपालिकाभिटर रहल सामुदायिक ओ संस्थागत विद्यालयमे स्थानीय पाठ्यक्रम लागू करल नगरपालिकाके शिक्षा शाखा प्रमुख उमेशराज रेग्मी जानकारी डेलै । यी क्षेत्रके भौगोलिक स्थिति, इतिहास, पर्यावरण, कला, सम्पदा, प्रचलित स्थानीय संस्कार, संस्कृति, स्थानीय बोलीचाली, नेपाल भाषाके प्रचलित लिपि, रञ्जना लिपि, परम्परागत पेसा, व्यवसाय, स्थानीय सीप प्रविधि ओ स्थानीय उपचार विधि समावेश करके पाठ्यक्रम निर्माण करके लागू करल उहाँ बटैलै ।

स्थानीय पाठ्यक्रमके अभावमे विद्यार्थी अपन कला, संस्कृति, परम्परा जैसिन महत्वपूर्ण विषयके बारेमे अध्ययन करे पैले नइरहिट । प्रभावकारी पाठ्यक्रमके कमीसे विद्यार्थीमे सीपमूलक व्यावहारिक ज्ञानके अभाव खड्कटी गैल महसुस करल ओरसे स्थानीय पाठ्यक्रम निर्माण करल नगरपालिका जनैले बा । कुछ महिना आघे शिक्षा युवा तथा खेलकुद शाखासे पाठ्यक्रमके प्रारूप उप्पर सरोकारवालाहुक्रनसंग छलफल करल रहे । ३ दिनसम चलल कार्यशाला गोष्ठीमे टमान सरोकारवालाहुक्रे सुझाव डेहल रहिट ।

पाठ्यक्रम निर्माणके लाग डा.राम बहादुर चौधरीके संयोजकत्वमे ३ सदस्यीय समितिफे निर्माण करल बा । डेहल सुझाव अन्सार स्थानीय पाठ्यक्रम निर्माण करके लागू करल घोडाघोडी नगरपालिका जनैले बा ।

स्थानीय ज्ञान, सीप, प्रविधि ओ संस्कृति भावी पुस्ताहे हस्तान्तरण कैनामे सघाउ पुग्न नगरपालिका विश्वास लेले बा । कक्षा १ से ३ सम पढैना स्थानीय पाठ्यक्रम १०० पूर्णाङकके रहल बा ।