आर्थिक सशक्तीकरण सम्बन्धी तालिम सुरु
पहुरा समाचारदाता
धनगढी, ९ माघ । महिला नेतृत्व विकास ओ आर्थिक सशक्तीकरण सम्बन्धी सात दिने तालिम शुकके रोजसे धनगढीमे सुरु हुइल बा ।
सभा नेपालके आयोजनामे सुरु हुइल तालिम महिलाके नेतृत्व विकास ओ आर्थिक सशक्तीकरण कैना उद्देश्यसे आयोजना करल हो । तालिमके उदघाटन कार्यक्रममे बोल्टी धनगढी उपमहानगरपालिकाके नगर उपप्रमुख सुशीला मिश्र भट्ट सामाजिक रुपमे सशक्ता हुइक लाग महिलाहे आर्थिक सशक्तीकरण आवश्यक रहल बटैली ।
उहाँ कहली, ‘जहाँ पैसा बा, उहाँ ताकट बा, मने महिलाहुक्रे अपनही कमाइल पैसा लगानी करे सेक्टे की नाई । छावा रहलेसे जटराफे लगानी कैना, छाई वा पटुहियनके लाग लगानी करे नइचाहना हमार समाजमे परिपाटी बैठल बा ।’
धनगढी उपमहानगरपालिका वडा नम्बर १ के अध्यक्ष सन्तोष मुडभरी नेपालके कानूनमे महिलाहे सहुलियत ओ करमे छुट डेहल कारण महिलाके नाउँमे जग्गा नाउँसारी कैना चलन बह्रल बटैलै । उहाँ कहलै, ‘नगरपालिकाके तथ्यांकमे जग्गा, व्यावसाय ७० प्रतिशत महिलाके नाउँमे आइल विल्गाइठ ।’ महिला जटरा घरे काम कलेसेफे ओकर मूल्यांकन भर नइहुइल उहाँ बटैलै ।
तालिमके उदघाटन कार्यक्रममे सप्रास नेपालके कार्यक्रम संयोजक चन्द्रबहादुर सिंह महिलाहुकनके आयस्रोतमे बृद्धि करेसेक्लेसे हिंसा न्यूनीकरण करे सेक्ना बटैलै । उहाँ कहलै, आर्थिक कारण हिंसा बह्रठ, टबमारे महिलाके आर्थिक सशक्तीकरण कैना जरुरी रहल बा ।’ उद्घाटन कार्यक्रममे प्रशिक्षक प्रतिमा शर्मा सात दिनसम सिखैना बाट जानकारी डेहल रहिट ।
सवा नेपालके वरिष्ठ कार्यक्रम संयोजक समृद्धि ढकालके अध्यक्षतामे हुइल कार्यक्रममे सवा नेपालके जिल्ला कार्यक्रम संयोजक दलबहादुर ओली संचालन करले रहिट । तालिममे धनगढी उपमहानगरपालिका, गोदावरी नगरपालिका ओ गौरीगंगा नगरपालिकाके १३ जानेक सहभागिता रहल बा ।
तालिममे प्रतिमा शर्मा, प्रतिमा पन्थी, पवन भण्डारी लगायतसे प्रशिक्षण डेटी रहल बटै । प्रशिक्षक प्रशिक्षण तालिममे सहभागी १३ जाने सवा नेपालसे संचालन करल कार्यक्षेत्रके ६५० जनहनहे फेरसे तालिम डेना जनागिल बा । तालिम यूएन वुमन ओ फाउडेशन च्यानलके सहयोगमे हुइटी रहल बा ।
