थारु पोस्टाके नाउँमे ढुर झोंक्ना काम

कैलालीके घोडाघोडी नगरपालिकासे कक्षा १ से ३ सम स्थानीय पाठ्यक्रम बना गइल समाचार आइल बा । थारु ओ नेपाली दुई भाषामे स्थानीय पाठ्यक्रम बनागैल बा ।

राष्ट्रिय पाठ्यक्रम प्रारूप २०७६ मे हुइल व्यवस्थाअन्सार नगरपालिकाभिट्टर रहल सामुदायिक ओ संस्थागत स्कुलिम स्थानीय पाठ्यक्रम लागु कइना नीतिअनुरुप पाठ्यक्रम टयार कइगैल नगरपालिकाके शिक्षा शाखा प्रमुख उमेशराज रेग्मी जनैले बाटै ।

पाठ्यक्रम ओ पाठ्यपुस्तक (पोस्टा) फरक चिज हो । स्थानीय पाठ्यक्रमके पोस्टाके कभरमे ’हाम्रो परिवेश’ उल्लेख बा । यकर अर्ठ पहिले नेपालीमे पाठ्यक्रम टयार कइगैल । ओकर पाछे हुबहु थारुमे उल्ठा कइगैल । आब इहे पाठ्यक्रमके आधारमे पोस्टा टयार हुइ कलेसे मौलिक नइ रहि । थारु पोस्टाके नाउँमे इ ढुर झोंक्ना काम किल हो ।

पाठ्यक्रम निर्माणके लाग डा. रामबहादुर चौधरीके संयोजकत्वमे ३ सदस्यीय समिति फे बना गइल रहे । मने इ समिति काजे मौलिक थारु पाठ्यक्रमके लग पहल नइ करल ? स्थानीय ज्ञान, सीप, प्रविधि ओ संस्कृति भावी पुस्ताहे हस्तान्तरण कैनामे सघाउ पुग्ना नगरपालिका विश्वास लेले बा । मने पाठ्यक्रम निर्माणके साँचा जो नेपालीमे टयार कइगैल ओर्से इ पाठ्यक्रमले खास उपलब्धी नइ हुइ ।

पहिले पाठ्यक्रम विकास केन्द्र, सानोठिमी, भक्तपुर फेन मेरमेरिक भाषाभाषीन्हे नेपाली पोस्टा आअपन भाषामे उल्ठा करे परल । काजे लावा पोस्टा लिखे परल कना प्रस्ताव कर्ले रहे । मने भाषाभाषीक लेखकलोग नै मन्लाँ । सब्जे आआपन भाषामे मौलिक पोस्टा टयार कर्ला ।

कैलालीके घोडाघोडी नगरपालिकाके मेयर ममताप्रसाद चौधरीके सोंच अपन नगरपालिकाहे ’शैक्षिक हब“मे रुपमे विकास कर्ना फेन रहिन । मने ‘हाम्रो परिवेश’ हे हमार परिवेश बनाके थारुपनहे लट्यइना काम नगरपालिका करटा । इहिले कसिक बनि ‘शैक्षिक हब’ ?

कैलालीके कैलारी गाउँपालिका फेन थारु पाठ्यक्रम बनैटि रहल खबर आइल बा । मने डर बा, ओहो ना थारु पाठ्यक्रमके नाउँमे घोडाघोडी नगरपालिकाहस ‘हाम्रो परिवेश’ हे खालि हमार परिवेशओर लैजैना डगरमे रहे ।

नै रहल मामासे काने मामा ठिक कहे हस कमसे कम ‘हाम्रो परिवेश’ पोस्टा हमार परिवेशके नाउँमे थारु भाषामे आइटा । सुरुवाती चरणमे इहि स्वागत करि । मने थरुहटमे रहले स्थानीय पालिकन्के जोर मौलिक थारु पोस्टा बनैना, लागु कैनामे जो हुइना चाहि ।